सुनिल गाउँले
सिमरा – रुस्लान सिमरा गोल्डकप फुटबल प्रतियोगिताको उपाधिका लागि यसपटक पनि रुस्लान थ्री स्टार क्लब र त्रिभुवन आर्मी क्लबबीच प्रतिस्पर्धा हुने भएको छ । हिमालयन शेर्पा क्लबलाई बिहीबार १–० ले हराउँदै थ्री स्टार फाइनलमा पुगेको छ ।
आर्मी भने बुधबार आयोजक नवजनजागृति युवा क्लबलाई पराजित गर्दै अन्तिम दुईमा पुगिसकेको छ । गत वर्षपनि यी दुई टोली भिड्दा आर्मीले बाजी मारेको थियो ।
स्थानिय सिमरा रंगशालामा अफ्रिकन मुलका फोफाना फोडेले गरेको गोल थ्री स्टारलाई उपाधि नजिक पु¥याउन पर्याप्त रह्यो । उनले ७१ औं मिनेटमा गोल गरेका थिए । थ्री स्टार कप्तान विक्रम लामा खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।
शनिबार हुने फाइनल विजेताले उपाधिसहित ६ लाख रुपैयाँ र दोस्रो हुने टोलीले ३ लाख रुपैयाँ प्राप्त गर्नेछ । शुक्रबार बारा र सर्लाही जिल्लाको महिला टोलीबीच मैत्रीपूर्ण फुटबल हुने आयोजक नवजनजागृति क्लबले जनाएको छ ।
