काठमाडौं (हाम्रो खेलकुद) – भारतको भुवनेश्वरमा नेपालसहित चार देशबीच हुने मैत्रीपुर्ण सिरिजको लागि नेपाली टोलीको घोषणा भएको छ ।
नेपाली महिला टोलीका मुख्य प्रशिक्षक हरि खड्काले शुक्रबार निरु थापाको कप्तानीमा २३ सदस्यीय नेपाली टोलीको घोषणा गरेको हो । नेपाली टोलीले करिव एक महिनाअघिबाट नियमित प्रशिक्षण गरिरहेको छ । यही २३ सदस्यीय टोलीबाट साफका लागि २० खेलाडी छनोट गरिने प्रशिक्षक हरि खड्काले बताएका छन् । प्रशिक्षक खड्काले मुख्य प्रतियोगिता अघिको यस्तो खालको खेलले टोलीलाई हौसला मिल्ने बताएका छन् ।
चार देशबीचको सिरिज भारतको भुवनेश्वरमा ७ फेब्रुअरीबाट १७ फेब्रुअरीसम्म चल्नेछ । सिरिजमा आयोजक भारत, नेपाल, म्यानमार र श्रीलंकाको सहभागिता रहेको छ । यो प्रतियोगितालाई आसन्न नेपालमै हुने पाँचौ महिला साफ च्याम्पियनसिपको तयारीको रुपमा हेरिएको छ ।
महिला साफ च्याम्पियनसिप विराटनगरमा १२ देखि २२ मार्चसम्म चल्नेछ । नेपाल रहेको समूह ‘ए’ मा बंगलादेश, भुटान र पाकिस्तान रहेका छन् ।
नेपाली टोली
गोलरक्षकः अन्जना रानामगर, उषानाथ र एन्जिला तुम्वाप्पो सुब्बा ।
डिफेन्डरः हीरा कुमारी भुजेल, गीता राना, पुनम जर्घामगर, अमृता जैसी, कविता धिमाल, सुनिता चौधरी, पुजा राना र मनमाया लिम्बु ।
मिडफिल्डरः बिमला चौधरी, अनिता बस्नेत, दीपा राई, मन्जली कुमारी योन्जन, शर्मिला थापा, सरु लिम्बु, रेनुका नगरकोटी र अनिता केसी ।
फरवार्डः अनु लामा, रेखा पौडेल, निरु थापा (कप्तान) र सावित्रा भण्डारी ।
