एजेन्सी – डिफेन्डिङ च्याम्पियन अष्ट्रेलियालाई स्तब्ध बनाउँदै आयोजक युनाइटेड अरब इमिरेट्स (यूएई) एसियन कप फुटबलको सेमिफाइनलमा प्रवेश गरेको छ ।
घरेलु टोली यूएईले बलियो प्रतिद्वन्द्वी अष्ट्रेलियामाथि १–० को जित निकाल्दै अन्तिम चारमा पुग्न सफल भएको हो । यूएईलाई सेमिफाइनलमा पुर्याउनका लागि अलि अहमेद मब्खाउटको एकमात्र गोल निर्णायक बन्यो ।
पहिलो हाफमा यूएईले अष्ट्रेलियालाई गोलरहित बराबरीमा रोक्न सफल भएको थियो । तर, ६८औं मिनेटमा अलिले गोल गर्दै युएईलाई अग्रता दिलाएका थिए । बाँकी समयमा अष्ट्रेलिया खेलमा फर्किन नसक्दा पराजित भयो ।
यूएई सेमिफाइनलमा प्रवेश गरेसँगै एसियन कपको सेमिफाइनल समिकरण पूरा भएको छ । सेमिफाइनलमा जापान, इरान र कतार प्रवेश गरेका छन् । सेमिफाइनलमा युएइ र कतार तथा इरान र जापानबीच प्रतिस्पर्धा हुनेछ ।
