सुनिल गाउँले
सिमरा – घरेलु फुटबलका दुई चर्चित क्लब त्रिभुवन आर्मी क्लब र रुस्लान थ्री स्टार क्लब आज रुस्लान १०औं सिमरा गोल्डकप फुटबल प्रतियोगिता उपाधिका लागि प्रतिस्पर्धा गर्दैछन् । आर्मी तेस्रो पटक उपाधि जित्ने दाउमा रहँदा थ्री स्टार भने पहिलो उपाधि उचाल्न चाहन्छ ।

आर्मीले गत वर्ष दोस्रो पटक उपाधि उठाएको थियो । त्यो फाइनलमा थ्री स्टारलाई नै हराएको थियो । आज फेरि एक पटक यी दुई टोलीले एकअर्काको सामना गर्दैछन् । गत महिना पल्सर सहिद स्मारक ए डिभिजन लिगपछि दुवै टोली अलग अलग प्रतियोगिता खेलेर सिमरा पुगेका हुन् ।

आर्मी वीरगन्जमा विशाल मेमोरियल गोल्ड कप जितेर सिमरा पुगेको हो । अर्को तिर थ्री स्टार भने सुदूरपश्चिमाञ्चल खप्तड गोल्ड कपको फाइनल खेलेर सिमरा गोल्ड कप खेल्न पुगेको हो । दुई दिनपछि यी दुई टोलीबीच इटहरीमा मदन भण्डारी स्मृति गोल्डकपको क्वार्टरफाइनलमा भेट हुनेछ ।
२०७१ को छैठौं संस्करण विजेता आर्मी चौथोपटक सिमरा गोल्डकपको फाइनलमा पुगेको हो । आठौं संस्करणमा भने टोली सिएमजी क्लब संकटासँग पराजित भएको थियो । नव जनजागृति युवा क्लब सिमराको आयोजनामा १० वर्षदेखि बारा जिल्लामा निरन्तर आयोजना हुने यो एउटा मात्रै राष्ट्रियस्तरको प्रतियोगिता हो ।

सिमरा गोल्डकपको इतिहासमा सिग्नेचर मनाङ–मस्र्याङ्दी क्लब र आर्मीले समान २ पटक उपाधि उचालेका छन् । यसपटक मनाङको सहभागिता रहने । आजको फाइनलमा थ्री स्टारलाई हराउन सके आर्मी प्रतियोगिताको सबैभन्दा सफल टोली हुनेछ । घरेलु फुटबलका लगभग अधिकांश प्रतियोगिता जितेको थ्री स्टारले भने सिमरा गोल्डकप जित्न सकेको छैन ।

एपीएफलाई ४–२ ले हराउँदै सिमरा गोल्डकपको यात्रा सुरु गरेको आर्मीले सेमिफाइनलमा आयोजक नव जनजागृति युवा क्लब सिमरालाई १–० ले पराजित गरेको थियो । थ्री स्टारले फाइनल सम्मको यात्रा तय गर्ने क्रममा क्वार्टरफाइनलमा संकटालाई २–० र सेमिफाइनलमा हिमालयन शेर्पा क्लबलाई १–० ले हराएको थियो ।

यसपटक थ्री स्टारका गोलकिपर एलन न्यौपानेको नाममा सर्वाधिक क्लिनसिट रहेको छ । आर्मीका टंक बस्नेत र थ्रीस्टारका फोफाना फोडे समान २ गोलसहित उच्च गोलकर्ताको शीर्षस्थानमा छन् ।
थ्री स्टारका प्रशिक्षक मेघराज केसीले आफ्नो टोली फाइलन जित्दै सिमरा गोल्डकपको शिल्डमा नाम लेखाउने प्रयासमा रहने बताएका थिए ।

आर्मीका प्रशिक्षक नवीन न्यौपानेले भने फाइनलका दुवै टोली राम्रो भएको कारण खेल ५०/५० हुने बताए । न्यौपाने भन्छन, ‘जसले मौकाको सदुपयोग गर्न सक्छ उसले नै उपाधि जित्छ । फाइनल पुग्ने दुबै टिम सशक्त हुने भएकाले विशेष रणनीति र मेहनतको जरुरी पर्ने न्यौपानेले बताएका थिए ।

सिमरा गोल्डकपका हाल सम्मका विजेता/उपविजेता
प्रथम संस्करण, २०६६- मजदुर शहिद स्मृति क्लब/गोर्खा व्वाइज बुटवल
दोश्रो संस्करण, २०६७- हिमालयन शेर्पा क्लब/एपिएफ
तेश्रो संस्करण, २०६८- मनाङ मस्र्याङदी क्लब/सहारा क्लब पोखरा
चौथो संस्करण, २०६९- मनाङ मस्र्याङदी क्लब/हिमालयन शेर्पा क्लब
पाँचौ संस्करण, २०७०- नवजनजागृति यूवा क्लब सिमरा/वीरगञ्ज यूनाइटेड
छैठौं संस्करण, २०७१- त्रिभुवन आर्मी क्लब/नेपाल पुलिस क्लब
सातौं संस्करण, २०७२- विजय युथ क्लब हेटौंडा/रुपन्देही ११
आठौं संस्करण, २०७३- सिएमजी संकटा क्लब/त्रिभूवन आर्मी क्लब
नवौं संस्करण, २०७४- त्रिभुवन आर्मी क्लब/थ्रीस्टार क्लब