एजेन्सी – सन् २०२२ को विश्वकप आयोजक राष्ट्र कतार एसियन कप फुटबलको फाइनलमा प्रवेश गरेको छ । दोस्रो सेमिफाइनलमा कतारले आयोजक संयुक्त अरब इमिरेट्स (युएईं) लाई ४–० को फराकिलो गोल अन्तरले पराजित गर्दै पहिलोेपटक एसियन कपको फाइनलमा प्रवेश गर्न सफल भएको हो ।
मोहम्मेद विन जायद स्टेडियममा भएको खेलमा कतारलाई फाइनलमा पु¥याउन बोउलिम खोउकी, अल्मोइज अली, हसान अल हाइडोज र हामिद इस्मेलले गोल गरे । कतारले खेलको २२औं मिनेटमा बोउलिम खोउकीको गोलबाट खेलमा अग्रता बनाएको थियो । उनले अक्रम अफिफको पासमा गोल गरेका थिए । ३७औं मिनेटमा अक्रम अफिफकै पासमा अल्मोइज अलीले गोल गरेपछि कतारले पहिलो हाफमा २–० को अग्रता बनाएको थियो ।
८१औं मिनेटमा हसन अल आइडोजले अक्रम अफिफकै पासमा गोल गरेपछि कतारले खेलमा ३–० को आरामदायी अग्रता बनाएको थियो । इन्ज्युरी समयको थप गरिएको दोस्रो मिनेटमा वैकल्पिक खेलाडीको रुपमा मैदान प्रवेश गरेका हामिद इस्मेलले गोल गर्दै कतारलाई ४–० को फराकिलो जित दिलाए । हामिद इस्मेल अक्रम अफिफको स्थानमा इन्ज्युरी समयको थप गरिएको पहिलो मिनेटमा मैदान प्रवेश गरेका थिए ।
खेलको अन्त्यतिर घरेलु टोली युएईं १० खेलाडीमा समेटिएको थियो । ९०औं मिनेटमा कतारका सलिम अल हाजरीलाई युएईंका इस्मेल अहमेदले फल गरेको रेफ्रीले भिएआरको सहायता लिदै सिधै रातो कार्ड देखाउदै मैदान बाहिर पठाएका थिए । घरेलु टोली युएईंले कुनै पनि समय कतारको पोस्टमा गतिलो आक्रमण बुन्न सकेन ।
सन् २०२२ को विश्वकप आयोजना गर्ने अधिकार पाएको कतारले पछिल्लो केही वर्षयता राम्रो फुटबल खेलिरहेको छ ।अब कतारले उपाधिका लागि चार पटकको च्याम्पियन जापानको सामाना गर्नेछ । जापानले इरानलाई ३–० ले पराजित गर्दै फाइनलमा स्थान बनाइसकेको थियो । फाइनल खेल फ्रेब्रुअरी १ मा हुनेछ ।
सर्वाधिक च्याम्पियन जापान पाँचौ उपाधिको खोजीमा रहँदा कतार पहिलो पटक एसियन च्याम्पियन बन्ने लक्ष्यमा हुनेछ ।
