एजेन्सी – फ्रेन्च फरवार्ड करिम बेन्जेमा स्पेनिस क्लब रियल मड्रिडको छैटौ सर्वाधिक गोलकर्ता बनेका छन् ।
स्पेनिस कोपा डेल रे अन्तरगत बिहीबार राति भएको जिरोनाविरुद्धको खेलमा २ गोल गरेसँगै बेन्जेमा (२०९) रियलको छैटौं सर्वाधिक गोलकर्ता बनेका हुन् । बेन्जेमाले ह्युगो सान्चेजको (२०८) गोललाई पछि पारेका हुन् ।
बेन्जेमा बिहीबार राति जिरोनाविरुद्ध दुई गोल गर्दै रियलका लागि २०९ गोल गर्दै छैटौ खेलाडी बनेका हुन् । ३१ वर्षीय बेन्जेमाले ला लिगामा १३६, च्याम्पियन्स लिगमा ४७, कोपा डेल रेमा २०, क्लब वल्डकपमा ३, स्पेनिस सुपर कपमा २ र युरोपिउन सुपर कपमा १ गोल गरेका छन् । बेन्जेमा सन् २००९ देखि रियलमा आबद्ध रहेका छन् ।
बेन्जेमा भन्दा अघि क्रिस्टियानो रोनाल्डो (४५१), राहुल (३२३), डि स्टेफानो (३०७), सान्टिललाना (२८८) र पुस्कास (२३७) रहेका छन् ।
