पोखरा (हाम्रो खेलकुद)- यो सिजन तीन प्रतियोगिताको फाइनल खेलेर दुई उपाधि जित्न सफल विभागीय त्रिभुवन आर्मी क्लबले सोमबार छैटौ संस्करणको मनकामना पोखरा कपमा डाफिन्स परिवार क्यामरुनसँग लज्जास्पद हार बेहोरेको छ ।

पोखरा रंगशालामा सोमबार भएको खेलमा दोस्रो रोजाईको टोली उतारेको आर्मीले डाफिन्स परिवारसँग ४–१ को लज्जास्पद हार बेहोर्दै क्वाटरफाइनलबाटै बाहिरियो । डाफिन्सले सेमिफाइनलमा स्थान सुरक्षित ग¥यो । आर्मी पहिलो हाफमा १–० ले पछि परेको थियो । दोस्रो हाफमा थप तीन गोल खान पुग्दा १ गोल फर्काउन सफल भयो ।

डाफिन्सको जितमा यान्निक ओओनाले २ तथा आर्मेल आहन्दा र ओको बोटाले समान १–१ गोल गरे । आर्मीका विवेक बस्नेतले एक गोल फर्काए । पहिलो हाफको इन्ज्युरी समयमा यान्निक ओओनाले गोल गर्दै डाफिन्सलाई अग्रता दिलाएका थिए ।

६०औं मिनेटमा दिदेर टिनाको पासमा यान्निक ओओनाले दोस्रो गोल गर्दै अग्रता दोब्बर बनायो । ६९औं मिनेटमा आर्मेल आहन्दाले गोल गरे । इन्ज्युरी समयको गरिएको पहिलो मिनेटमा ओको बोटाले गोल गर्दै डाफिन्सको जित पक्का गरे । तर, इन्ज्युरी समयमै आर्मीका विवेक बस्नेतले गोल गरेपनि खेलमा फर्कन निकै ढिला भएको थियो ।

आर्मीका प्रशिक्षक गंगा देउजाले पहिलो रोजाईका खेलाडीलाई भुटान जानुपर्ने भएकोले विश्राम दिदा दोस्रो रोजाईको खेलाडीबाट नतिजा निकाल्न नसकिएको बताए ।
मंगलबार जापानको रिस्सो विश्वविद्यालय र नेपाल पुलिस क्लबबीच खेल हुने आयोजक एन्फा कास्कीले जनाएको छ ।