बिर्तामोड (हाम्रो खेलकुद)- – यसै साता आयोजना हुने झापा स्पोर्टस् अवार्ड २०७४ का खेलाडी र प्रशिक्षकको मनोनयन सार्वजनिक भएको छ ।

नेपाल खेलकुद पत्रकार मञ्चको झापा समन्वय शाखाको प्रतिभा छनोट समितिले पत्रकार सम्मेलनमार्फत खेलाडी र प्रशिक्षकको गरि चार विद्याको मनोनयन सार्वजनिक गरेको हो ।
स्वर्गिय आशिषविक्रम नेम्बाङको स्मृतिमा गत वर्षदेखि सुरु झापा स्पोर्टस् अवार्डमा यसवर्ष फुटबल खेलबाट बढी मनोनयमा परेका छन् ।

मञ्चका सचिव पर्वत पोर्तेलको संयोजकत्वमा रहेको छनोट समितिले गरेको मनोनयमा वर्ष उत्कृष्ट खेलाडी (पुरुषमा फुटबलका विशाल राई बी, अनन्त तामाङ र नवयुग श्रेष्ठ मनोनयनमा परेका छन् । उनीहरु तीनै जना राष्ट्रिय टोलीका सदस्य हुन् । नवयुग इलामका तथा अनन्त र विशाल झापाका हुन् ।

जुडोकी देविका खड्का, करातेकी एस्तर राई र फुटबलकी अन्जिला सुब्बा वर्ष उत्कृष्ट खेलाडी महिलाको मनोनयमा परेका छन् । एपिएफकी देविका र एस्तर झापाका हुने भने महिला फुटबल राष्ट्रिय टोलीकी गोलकिपर अन्जिला इलामकी हुन् ।

सह संयोजक हिमाल खरेल रहेको समितिले तयार पारेको मनोनयनको वर्ष उत्कृष्ट युवा खेलाडीमा ताप्लेजुङकी एथलेटिक्स खेलाडी सविता कार्की , एथलेटिक्सकै प्रकाश दुनावार र फुटबलकी सम्झना लावती छन् । प्रकाश र सम्झना झापाका हुन् ।

वर्ष उत्कृष्ट प्रशिक्षकतर्फ जुडोका गंगा खड्का, क्रिकेटका विरु श्रेष्ठ र बक्सिङका डम्बर लिम्बू मनोनयनमा परेका छन् । तीनै जना प्रशिक्षक झापाका हुन् ।

समितिले यसवर्षदेखि गर्न लागेको लाइफटाइम अचिभमेन्ट अवार्ड र पिपुल्स च्वाइज प्लेयरको निश्चित भइनसकेको उल्लेख गर्दै अवार्डकै दिन शनिबार सार्वजनिक गर्ने जनाएको छ । अवार्ड बिर्तामोडस्थित आदर्श व्याङ्क्वेटमा हुने बताइएको छ ।

उत्कृष्ट खेलाडी पुरुषले मोटरसाइकल र महिलाले स्कुटी प्राप्त गर्नेछन् । युवा, प्रशिक्षक र पिपुल च्वाइज प्लेयरले जनही २५ हजार रुपैयाँ प्राप्त गर्नेछन् । लाइफटाइम अचिभमेन्टले भने ३५ हजार रुपैयाँ पाउने बताइएको छ ।

पुरस्कार राशि एन्फाका उपाध्यक्ष पंकजविक्रम नेम्बाङले प्रदान गर्नेछन् भने मोटरसाइकल र स्कुटी झापा ११ एफसीका अध्यक्ष जलकुमार गुरुङले प्रायोजन गरेका हुन् ।

एनएसजेएफ झापाका अध्यक्ष रमेश समदर्शी राईका अनुसार अवार्डको तयारी अन्तिम पुगेको छ । आर्थिक उपसमितिका संयोजक बुद्ध तामाङले अवार्डका लागि झन्डै ५ लाख ५० हजार रुपैयाँ खर्च हुने बताए ।