काठमाडौं (हाम्रो खेलकुद) – अखिल नेपाल फुटबल संघ (एन्फा) को आयोजनामा सहिद स्मारक बी डिभिजन लिग फुटबल प्रतियोगिता शुक्रबारदेखि सुरु हुँदैछ । यसअघि आयोजना गरिएको शीर्ष डिभिजन लिग जस्तै बी डिभिजनमा पनि घटुवा र बढुवा हुने छैन ।

प्रतियोगिताको विजेताले ८ लाख रुपैयाँ प्राप्त गर्नेछन् भने उपविजेताले ५ लाखमा चित्त बुझाउनेछन् । तेस्रो र चौथो स्थान हासिल गर्नेले क्रमश: ३ लाख र २ लाख रुपैयाँ प्राप्त गर्नेछन् । विधागत उत्कृष्टतर्फ प्रत्यक खेलाडीले २५ हजार रुपैयाँ पाउनेछन् । दुवै समूहको पुछारमा रहने टोलीले अर्को सिजन १ अंक गुमाउनेछन् ।

सहभागी तोइलाई दुई समूहमा विभाजन गरेर सिंगल राउण्ड रोबिनमा पहिलो चरण खेलाइनेछ । दुवै समुहका शीर्ष दुई टोली दोस्रो चरणका लागि छनोट हुनेछन् । दोस्रो चरणमा चार टोलीले एकआपसमा खेल्नेछन् । दोस्रो चरणमा सबै टोलीले शुन्य अंकबाट सुरुवात गर्नेछन् ।

प्रतियोगिताको समूह ‘ए’ मा झम्सिखेल युवा क्लब, रानीपोखरी कर्नर टिम, श्री कुमारी क्लब, सातदोबाटो युवा क्लब, नयाँबस्ती युवा क्लब र ब्वाइज युनियन क्लब रहेका छन् । समूह ‘बी’ मा टुसाल युवा क्लब, पुल्चोक स्पोर्ट्स क्लब, मध्यपुर युथ एसोसियसन, खुमलटार युवा क्लब, बाँसबारी क्लब र श्री भगवती क्लबले प्रतिसपर्धा गर्नेछन् ।

सहभागी प्रत्यक टोलीलाई एन्फाले तयारीका लागि ७ लाख रुपैयाँ प्रदान गर्नेछ । प्रतियोगिताको कुल बजेट १ करोड ५० लाख रुपैयाँ रहेको छ । प्रतियोगिताको उद्घाटन खेलमा शुक्रबार झम्सिखेल युवा क्लब र ब्वाइज युनियन क्लब भिड्नेछन् ।