म्याड्रिड (एजेन्सी)– ब्राजिलियन स्टार नेयमारको जन्म दिनमा पेरिस सेन्ट जर्मेन (पिएसजी) का अर्का स्टार फ्रान्सेली केलियन एमबाप्पले रातो सुट र सेतो टिसर्टमा सजिएर नाचेका थिए ।
त्यहि फोटो एमबाप्पले इन्स्टाग्राम पोष्ट गरेका थिए । उक्त पोष्टमा उनका फ्रान्सेली सहकर्मी एवम् असल मित्र मध्येका एक एन्टोइन ग्रिजम्यानले कमेन्ट गरेका छन् । ग्रिजम्यानले रातो र सेतो लगालाई लिएर मौकाका रुपमा लिदै एट्लेटिको म्याड्रिडमा आबद्ध हुन आग्रह गरेका छन् ।
सयौंले एमबाप्पेको तस्बिरमा कमेन्ट गरेका छन् । तर, ग्रिजम्यानले भने उनले लगाएको लुगा र एट्लेटिको जर्सीको रंग एउटै भएको प्रसंग कोट्याएका छन् । ग्रिजम्यानले भनेका छन्, एट्लेटिको आउ र म सँगै खेल ।
गत सिजनयता पिएसजी पुगेका एमबाप्पेले क्लब फुटबलदेखि राष्ट्रिय टोलीबाट उच्च प्रदर्शन गरिरहेका छन् । विश्वकपका उत्कृष्ट युवा खेलाडी समेत घोषित भएका एमबाप्पे र ग्रिजम्यान दुवैले विश्वकपमा उच्च प्रदर्शन गरेका थिए । अहिलेको विश्व फुटबलमा एमबाप्पे चर्चामा रहेका खेलाडी हुन् ।
ग्रिजम्यानले एट्लेटिको आउन आग्रह गरेपनि एमबाप्पले त्यहाँ जाने सम्भावना न्यून छ । अब एमबाप्पले ग्रिजम्यानको कमेन्टमा कस्तो प्रतिक्रिया दिनेछन् त्यो भने कौतुहलताको विषय बनेको छ ।
