काठमाडौं (हाम्रो खेलकुद) – पोखराको साहारा क्लबलाई सडन डेथमा ४-३ ले पराजित गर्दै नेपाल पुलिस क्लब बुढासुब्बा गोल्ड कप फुटबल प्रतियोगिताको सेमिफाइनलमा प्रवेश गरेको छ । निर्धारित ९० मिनेटको खेल १-१ को बराबरीमा सकिएपछि खेलको निर्णय टाइब्रेकरबाट लिइएको थियो ।

सोमबार धरान रंगशालामा खेलको ३३ औं मिनेटमा पुलिसले अग्रता लिएको थियो । रवी पासवानले पेनाल्टी क्षेत्रभित्रबाट दिएको पासलाई निरकुमार राईले गोलमा परिणत गर्दै पुलिसलाई अग्रता दिलाएका थिए ।

दोस्रो हाफको ८४ औं मिनेटमा साहाराले बराबरी गोल फर्कायो । पुलिसका अजित भण्डारीले पेनाल्टी क्षेत्रभित्र ह्यान्ड गरेपछि प्राप्त पेनाल्टीमा विश्व अधिकारीले गोल गरे । टाइब्रेकरमा दुवै टोलीले २-२ प्रहार चुकाउँदा सडन डेथमा पुलिसले जित हासिल गरेको हो ।

टाइब्रेकरमा पुलिसका लागि अजित भण्डारी, देवेन्द्र तामाङ र सुमन सुवेदीले गोल गर्दा तेज तामाङ र हरि कठायतको अन्तिम दुई प्रहार चुकेको थियो । साहाराका गोविन्द थापाले पहिलो प्रहार चुकाउँदा विश्व अधिकारी, विनोद गुरुङ र कुलदिप कार्कीले गोल फर्काए । अन्तिम प्रहारमा रमेश मगर चुकेपछि खेल सडन डेथमा धकेलियो । पुलिसका भरत शाहले गोल गरेपछि साहाराका अन्जन देवकोटा चुक्दा पुलिस विजयी भएको थियो ।

खेलमा पुलिसलाई अग्रता दिलाएका मिडफिल्डर निरकुमार राई म्यान अफ द म्याच भए । उनले १५ हजार रुपैयाँ प्राप्त गरे ।