काठमाडौं (हाम्रो खेलकुद) – नेपाली राष्ट्रिय क्रिकेट टोलीका कप्तान पारस खड्काले नेपाली महिला राष्ट्रिय फुटबल टोलीले हालै गरेको प्रदर्शनको तारिफ गरेका छन् । नेपाली महिला फुटबल टोली भारतको भुवनेश्वरमा जारी हिरो कप च्याम्पियनसिपको फाइनलमा पुगेको छ । शुक्रबार नेपाली टोलीले म्यानमारको सामना गर्दैछ ।

क्विन्स इभेन्ट म्यानेजमेन्टले महिला क्रिकेटको फ्रेन्चाइज प्रणालीमा हुने वमन च्याम्पियन्स लिग (डब्लूसिएल) आयोजनाको जानकारी दिन आयोजित कार्यक्रममा पारसले भने, ‘महिला फुटबल टोलीले जुन सफलता प्राप्त गरेको छ । त्यसका लागि बधाई दिनुपर्दछ । त्यसले अन्य खेलाडीलाई पनि मोटिभेट गरेको छ ।’

राष्ट्रिय महिला क्रिकेट टोलीका खेलाडीको समेत कार्यक्रममा उपस्थिति रहेकोले उनीहरुलाई उत्साहित बनाउने क्रममा पारसले नेपाली महिला फुटबल टोलीको प्रसंग उठाएका थिए । ‘महिला फुटबलको सफलताको हामीले तारिफ गर्नुपर्दछ’, उनले भन, ‘त्यसले हाम्रो महिला टोलीलाई पनि हौसला मिल्नेछ ।’

म्यानमारसँग ३–० ले पराजित हुँदै हिरो कपको सुरुवात गरेको नेपाली टोलीले त्यसपछि भारतलाई २–१ र इरानलाई ३–० ले हराउँदै फाइनलको यात्रा तय गरेको थियो । यसै महिना विराटनगरमा आयोजना हुने महिला साफ च्याम्पियनसिपको तयारीका क्रममा नेपाली टोलीले हिरो कपमा भाग लिइरहेको छ ।