धरान (हाम्रो खेलकुद)– क्यामरुनको दाउफिन्स फुटबल क्लब धरानमा जारी बुढासुब्बा गोल्ड कप फुटबल प्रतियोगिताको फाइनलमा पुगेको छ ।
नेपाल पुलिस क्लबलाई सडन डेथमा हराउँदै दाउफिन्सले आयोजक क्लबसँगको उपाधि भिडन्त पक्का गरेको हो । आयोजक धरान फुटबल क्लब यसअघि नै अन्तिम दुईमा पुगिसेको छ ।
निर्धारित समय गोलरहित बराबरी र सुरुवाती ५ पेनाल्टीमा पनि ५–५ को बराबरी भएपछि सडन डेथमा दाउफिन्सले बाजी मारेको थियो । सडन डेथमा दाउफिन्स ७–६ ले विजयी भएको थियो ।
नेपाल आगमनपछि चौथो प्रतियोगिता खेलिरहेको दाउफिन्सले यसै साता मनकामना केबुलकार फुटबल प्रतियोगिताको उपाधि जितेको थियो ।
