दीपक न्यौपाने, बुटवल

फरवार्ड कर्ण लिम्बूको उत्कृष्ट प्रदर्शनमा झापा-११ फुटबल क्लबले २१ औं तिलोत्तोमा गोल्डकपको उद्घाटन खेलमा नेपाल एपीएफ क्लबलाई २-० पराजित गरेको छ । यस जितसँगै झापा प्रतियोगिताको क्वाटरफाइनलमा प्रवेश गरेको छ ।

खेलको आठौं मिनेटमा कर्णकै गोलमा झापाले सुरुवाती अग्रता लिएको थियो । दोस्रो हाफको ५० औं मिनेटमा बुद्ध तामाङले झापाको अग्रता दोब्बर पारे । खेलको म्यान अफ द म्याच झापाका कप्तान समेत रहेका कर्ण भए ।

यस जितसँगै झापा प्रतियोगिताको क्वाटरफाइनलमा प्रवेश गरेको छ । झापाले अब क्वाटरफाइनलमा दाउफिन्स फुटबल क्लबको सामना गर्नेछ । क्वाटरफाइनल खेल फाल्गुन ८ गते हुनेछ ।

फागुन १३ गते सम्म चल्ने प्रतियोगितामा दुई विदेशी टोली क्यामरुनको दाउफिन्स एफसी, भारतको ब्रदर्श युनाइटेडको सहभागिता रहेको छ । प्रतियोगिताको विजेताले ८ लाख ८० हजार र दोस्रो हुने टोलीले ५ लाख ५० हजार रुपैयाँ पाउनेछन् ।

प्रतियोगिताको सर्वोत्कृष्टले स्कुटर प्राप्त गर्नेछन् । विधागत उत्कृष्ट खेलाडी र प्रशिक्षकले समान २५ हजार रुपैयाँ प्राप्त गर्नेछन् । २०३१ सालमा स्थापना भएर २०३३ सालबाट शुरु भएको तिलोत्तमा गोल्डकपको उपाधि गत वर्ष रुस्लान थ्री स्टार क्लबले जितेको थियो ।
उद्घाटन ……………….
रुपन्देही जिल्ला फुटबल संघले आयोजना गरेको प्रतियोगिताको उद्घाटन बुटवल उपमहानगरपालिकाका मेयर शिवराज सुवेदीले गरे । बुटवल उपमहानगरपालिका प्रतियोगिताको संरक्षक हो । मेयर सुवेदीले तिलोत्तमा गोल्डकपले यस क्षेत्रको खेलकुद बिकासमा महत्वपूर्ण टेवा पुराएको बताए ।

अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले फुटबल बिकासका लागी ग्रासरुटबाटै कार्यक्रम ल्याइएको जानकारी दिदै सबै क्षेत्रको सहयोगले फुटबलको बिकास हुने बताए ।

जिल्ला खेलकुद विकास समितिरुपन्देहिका अध्यक्ष योग गुरुङले रुपन्देही अन्य क्षेत्र जस्तै खेलकुदमा पनि अघि बढेको दाबी गरे । प्रतियोगिता यशोदा फुड्स प्रालीको मुख्य प्रायोजन सञ्चालन भएको छ ।

घरेलु टोलीविरुद्ध मोरङ ११
प्रतियोगिता आइतबार घरेलु टोली लाली रुपन्देही र मोरङ ११ बीच प्रतिस्पर्धा हुनेछ । १४ औं र १८ औं अठारौ संस्करणको विजेता टोली समेत रहेको रुपन्देही यसपटक पनि उच्च प्रदर्शन गर्ने लक्ष्य राखेको छ । मोरङले भने अहिले सम्म तिलोत्तमा गोल्ड कप जित्न सकेको छैन ।