काठमाडौं (हाम्रो खेलकुद) – नेपाल यू-१९ राष्ट्रिय टोलीका कप्तान तथा गोलरक्षक अर्पण कार्कीले उत्कृष्ट प्रदर्शन गरेपछि पारो फुटबल क्लब जिग्मे दोर्जी वाङचुक मेमोरियल गोल्डकपको सेमिफाइनलमा प्रवेश गरेको छ । पारोले जयगाँव फुटबल क्लबलाई २-१ ले पराजित गर्दा अर्पण म्यान अफ दि म्याच घोषित भए ।

भुटानको फुन्तसोलिङमा अाइतबार पारोले खेलको पहिलो हाफको इन्जुरी समयमा अग्रता लिएको थियो । जन जेनियामाले पारोलाई सुरुवाती अग्रता दिलाएका थिए । उनले खेलको ५७ अौं मिनेटमा अग्रता दोब्बर पारे । तर त्यसको एक मिनेटपछि नै जयगाँवका लागि स्वाङ लामाले एक गोल फर्काए । खेलको अन्तिम मिनेटमा अर्पणले उत्कृष्ट बचाउ गरेपछि पारोले सेमिफाइनल यात्रा तय गरेको हो ।

पछिल्लो समय नेपालमा नेपाल पुलिस क्लबबाट घरेलु फुटबल खेल्दै आएका अर्पण यसै प्रतियोगिताको लागि भुटान पुगेका हुन् । उनले यसअघि माल्दिभ्सको दोस्रो श्रेणीबाट पनि खेलिसकेका छन् । नेपालले आगामी मार्चमा खेल्ने एएफसी यू-२३ च्याम्पियनसिप छनोटमा उनले टोलीको जिम्मेवारी सम्हाल्ने प्रबल सम्भावना रहेको छ ।

पारोले अब सेमिफाइनलमा नेपालकै त्रिभुवन आर्मी क्लबको सामना गर्नेछ । अार्मीले थिम्पु सिटीलाई ६-० को फराकिलो अन्तरले पराजित गर्दै सेमिफाइनलमा स्थान बनाएको थियो । खेल १९ फेब्रुअरीमा हुनेछ । अर्को नेपाली क्लब रुस्लान थ्री स्टार पनि प्रतियोगिताको सेमिफाइनलमा प्रवेश गरिसकेको छ ।