एजेन्सी – इटालियन सिरी ए अन्तर्गत आइतबार दोस्रो स्थानको नेपोली र नवौं स्थानको टोरीनोको खेल गोलरहित बराबरीमा टुंगिएको छ ।
नेपोलीको घरेलु मैदानमा नवनियुक्त कप्तान लोरेन्जो इन्सिगने पाएका अवसर सदुपयोग गर्न नसक्दा खेलमा कुनै गोल हुन सकेन । नेपोलीले अधिकांश समय दबाब बनाएपनि टोरीनोका गोलरक्षक साल्भाटोरे सिरिगु लगातार बाधक बनिरहे । यसअघिको खेलमा पनि नेपोली फिओरेन्टिनासँग गोलरहित बराबरीमा रोकिएको थियो ।
बराबरीले शीर्ष स्थानको युभेन्ट्सलाई निकै फाइदा पुगेको छ । युभेन्ट्सले १३ अंकको अग्रता लिंदै उपाधि जित्ने सम्भावनालाई अझै बलियो बनाएको छ । युभेले जारी सिजन अपराजित यात्रा कायम गर्दै २४ खेलमा २१ जित र ३ बराबरीसहित ६६ अंक जोडेको छ । यता दोस्रो स्थानको नेपोली २४ खेलमा १६ जित, ५ बराबर र ३ हारसहित ५३ अंकमा रहेको छ ।
