एजेन्सी – यूईएफए च्याम्पियन्स लिगको समूह चरणमा अपराजित रहेका दुई टोली बार्सिलोना र लियोन प्रतियोगिताको राउण्ड अफ १६ को पहिलो लेगमा खेल्दैछन् ।
युरोपका ठूला टोलीलाई पराजित गरेको लियोन बार्सिलोनालाई स्तब्ध पार्ने तयारीका साथ मैदान उत्रनेछ । लिग वनमा पेरिस सेन्ट जर्मेनलाई पराजित गरेको लियोनले समूह चरणमा म्यानचेस्टर सिटीलाई पाखा लगाएको थियो । बार्सिलोनाका मिडफिल्डर सर्जियो बुस्केट्स पनि लियोनलाई कमजोर रुपमा नलिने बताउँछन् ।
‘म् लियोनलाई निकै सम्मान गर्छु । पीएसजीलाई पराजित गर्नु सहज कार्य होइन,’ उनले भने, ‘लियोनको मिडफिल्डमा निकै छरिता खेलाडी छन् । आक्रमणमा पनि स्तरीय खेलाडीहरु छन् । हामीले निकै मिहिनेत गर्नुपर्छ ।’
लियोनका कप्तान नाबिल फेकिर प्रतिबन्धमा छन् भने अर्का मिडफिल्डर तान्गु एनदोम्बेले चोटका कारण खेल्ने नखेल्ने शंकामा छ । बार्सिलोनाका डिफेन्डर स्यामुएल उम्टिटीले यस खेलमा चोटबाट पुनरागमन गर्ने सम्भावना रहेको छ । थोमस भर्मालेन भने चोटका कारण उपस्थित रहने छैनन् ।
पछिल्लो पटक यी दुई टोलीले सन् २००८/०९ को राउण्ड अफ १६ मा प्रतिस्पर्धा गरेका थिए । त्यसबेला बार्सिलोना ६-३ ले विजयी रहेको थियो । लियोनले राउण्ड अफ १६ पुगेको पछिल्लो ६ प्रयासमा एक पटक मात्र अगाडी बढेको छ ।
