पोखरा (हाम्रो खेलकुद)– घरेलु फुटबल पुरानो गोल्ड कप मध्येको एक आहा रारा गोल्ड कपको १७ औं संस्करण आज सुरु हुँदैछ । पोखरा रंगशालामा हुने उद्घाटन खेलमा नेपाल एपिएफ क्लबले आयोजक सहारा क्लबको सामना गर्नेछ ।
१० टोलीको सहभागिता रहेको प्रतियोगितामा यसपटक पुरस्कार राशिमा वृद्धि गरिएको छ । प्रतियोगिताको विजेताले ८ लाख १ हजार रूपैया तथा दोस्रो हुनेले ४ लाख १ हजार रूपैयाँ पाउनेछन् । गत संस्करणमा विजेताले ७ लाख १ हजार र उपविजेताले ३ लाख ५१ हजार पाएका थिए ।
फागुन १८ फागुनसम्म हुने प्रतियोगिताको मुख्य प्रायोजक हिमश्री फुड्स प्रालिको उत्पादन आहा तथा रारा तयारी चाउचाउ रहेको छ । आहा गोल्ड कपमा सिग्नेचर मनाङ–मस्र्याङ्दी क्लब, त्रिभुवन आर्मी क्लब, नेपाल एपीएफ क्लब, नेपाल पुलिस क्लब, धरान फुटबल क्लब, भारतको युनाइटेड सिक्किम फुटबल क्लब, रुस्लान थ्री स्टार क्लब, आयोजक सहारा क्लब पोखरा, क्यामरुनको डाउफिन्स फेमिली टिम फुटबल क्लब र हिमालयन शेर्पा क्लब रहेका छन् ।
प्रतियोगिताबाट १ करोड ३० लाख आम्दानी हुने र खर्च कटाइ ३२ लाख २ हजार बचत गरिने क्लबको लक्ष्य रहेको आयोजकले जनाएको छ । सर्वोत्कृष्ट खेलाडीलाई स्कुटर, वेष्ट अफ फाइभ विधातर्फ जनही १५ हजार र ट्रफी दिइनेछ । यस्तै सर्वाधिक गोलकर्ता खेलाडीले २५ हजार साथमा ट्रफी पाउनेछ ।
उद्घाटनमा सर्वोत्कृष्ट राष्ट्रिय फुटबल खेलाडी सम्मानवापत ३५ हजार रुपैयाँ प्रदान गर्ने तयारी समेत गरेको छ । सहाराले पोखरा १७ दोबिल्लामा सहारा एकेडेमी संचालन गरी १६ जिल्लाका विपन्न तथा कठिन परिस्थितिका २८ जना बालकलाई फुटबल सिकाउँदै आवासीय सुविधा दिएको छ । आहा रारा १७ औं संस्करण भएपनि क्लबले सुरुवातमा क्याराभानसहित आयोजना गरेको यो १८औं संस्करण हो ।
