दिपक न्यौपाने, बुटवल
दाउफिन्स फुटबल क्लबले आयोजक लाली रुपन्देही-११ लाई २-० ले पराजित गर्दै तिलोत्तोमा गोल्डकप फुटबल प्रतियोगिताको फाइनलमा स्थान पक्का गरको छ ।
शुक्रबार भएको पहिलो सेमिफाइनलमा दाउफिन्सको जितमा दुवै गोल डीडर टिनाले गरे । उनले खेलको सुरुवाती मिनेटमा गोल गर्दै दाउफिन्सलाई अग्रता दिलाएका थिए । टिनाले ८४ औं मिनेटमा दोस्रो गोल गर्दै दाउफिन्सलाई लगातार तेस्रो फाइनलमा पुर्याए ।
खेलमा उत्कृष्ट प्रदर्शन गरेका रुपन्देहीका मनोज श्रेष्ठ म्यान अफ द म्याच भए । उनले १० हजार रुपैयाँ प्राप्त गरे । विजयी टोली दाउफिन्स लगातर तेस्रो उपाधि जित्ने दाउमा छ । यसअघि पोखराको मनकामना कप र धरानको बुढासुब्बा गोल्डकप उपाधि दाउफिन्सले जितेको थियो ।
प्रतियोगिताको दोस्रो सेमिफाइनलमा भ्याली च्यासल युवा क्लब र नेपाल पुलिस क्लब खेल्नेछन् । फाइनल खेल फाल्गुन १३ गते हुनेछ ।
