काठमाडौं (हाम्रो खेलकुद) – नेपाली पुरुष राष्ट्रिय फुटबल टोलीको कार्यवाहक प्रशिक्षकका रुपमा रहेका प्रशिक्षक बालगोपाल महर्जनले नेपाल यू-२३ पुरुष राष्ट्रिय फुटबल टोलीको मुख्य प्रशिक्षकको जिम्मेवारी पाएका छन् ।

एन्फाले आइतबार स्विडिस प्रशिक्षक योहान कालीनलाई सिनियर राष्ट्रिय टोलीको भूमिकामा नियुक्त गरेसँगै यू-२३ टोलीको जिम्मेवारी महर्जनलाई सुम्पिएको हो । यसअघि कालीनले नै यू-२३ टोली हेर्ने भनिएपनि मलेसियाविरुद्ध मार्च २५ मा हुने मैत्रीपूर्ण खेल एएफसी यू-२३ च्याम्पियनसिप छनोटसँग जुधेकाले कालीनले राष्ट्रिय टोलि हेर्नेछन् ।

यू-२३ च्याम्पियनसिप छनोट एकै समय रहेकाले राष्ट्रिय टोलीमा सबै सदस्य भने उपलब्ध हुने छैनन् । नेपालले एएफसी यू-२३ च्याम्पियनसिप छनोटमा मार्च २२ देखि २६ सम्म प्रतिस्पर्धा गर्दैछ । नेपालको समूहमा आयोजक कतारसँगै अफगानीस्तान र ओमान रहेका छन् ।

प्रशिक्षकको जिम्मेवारी पाएपछि महर्जनले समूहमा अन्य टोली निकै राम्रो स्तरको भएपनि आफ्नो सक्दो प्रयास गर्ने बताए । ‘राष्ट्रिय टोलीमा खेल्ने स्तरका खेलाडी पनि टोलीमा छन् । अब दुवैतर्फ सन्तुलित टोली बनाएर तयारी अगाडी बढाउने छौं । अबको केहि दिनमा हामीले प्रशिक्षण सुरु गर्ने छौं । प्रतियोगिता आउन ३ सातामात्र बाँकी रहेकाले छोटो तयारीमा जाँदैछौं,’ उनले भने ।

साफ च्याम्पियनसिपमा राष्ट्रिय टोलीको प्रशिक्षण सम्हालेका महर्जनले नेपाललाई सेमिफाइनलसम्म पुर्याएका थिए । उनले त्यसअघि उमेर समूहको टोलीको पनि जिम्मेवारी सम्हालेका छन् । सन् २०१५ मा साफ यू-१९ च्याम्पियनसिप जित्दाका अधिकांश खेलाडी यसपटक यू-२३ टोलीमा रहने सम्भावना छ । त्यसबेला टोलीको प्रशिक्षक बालगोपाल नै थिए ।