पोखरा (हाम्रो खेलकुद) – फरवार्ड अनिल गुरुङले सिजनको उच्च प्रदर्शन गर्दै ह्याट्रिक पूरा गरेपछि रुस्लान थ्री स्टार क्लब पोखरामा जारी १७औं संस्करणको आहा रारा गोल्डकप फुटबल प्रतियोगिताको सेमिफाइनलमा प्रवेश गरेको छ ।

पोखरा रंगशालामा सोमबार भएको क्वाटरफाइनल खेलमा थ्री स्टारले भारतको सिक्किम युनाइटेड फुटबल क्लबलाई ५–२ ले पराजित गर्दै प्रतियोगिताको अन्तिम चारमा पुग्न सफल भएको हो । थ्री स्टारको सहज जितमा अनिल गुरुङले ह्याट्रिक पुरा गरे ।

अजायी मार्टिन्सले एक गोल थप्दा अर्को एक गोल आत्मघाती रुपमा उपहार पाएको थियो । सिक्किमका सोनाम छिरिङ भुटिया र ओन छिरिङ लेप्चाले गोल गरे । थ्री स्टारले खेलको २४औं मिनेटमा अनल गुरुङको गोलबाट अग्रता बनाएको थियो ।

सिक्किमका खेलाडीले थ्री स्टारका सुशील राईलाई फल गरेपछि थ्री स्टारले पेनाल्टीको मौका पाएको थियो । जसलाई अनिल गुरुङले सदुपयोग गरेका हुन् । गत पुसमा सकिएको लिग अघि मनाङबाट थ्री स्टारमा अनुबन्धित भएका अनिलले जारी सिजनमा थ्री स्टारका लागि पहिलो गोल गरेका हुन् ।

पहिलो हाफमा १–० को अग्रता बनाएको थ्री स्टारले दोस्रो हाफमा ४ गोल गर्न सफल हुँदा २ गोल खान पुगेको थियो । ५०औं मिनेटमा अनिल गुरुङले क्रस गरेको बललाई सिक्किमका खेलाडीले क्लियर गर्न खोज्दा गोल भएपछि थ्री स्टारले खेलमा २–० को अग्रता बनाएको थियो ।

अनिलले अजायी मार्टिनलाई दिएको पासलाई सिक्किमका डिफेन्डरले क्लियर गर्न खोज्दा गोलरक्षकलाई लागदै फर्किएपनि पुनः डिफेन्डर जिग्मी देर्जी भुटियालाई लाग्दै गोल भएको थियो । ७०औं मिनेटमा विपक्षी  डिफेन्डरको गल्तीको फाइदा उठाउदै मार्टिन्सले गोल गर्दै थ्री स्टारलाई ३–० ले अघि बढाएका थिए ।

डिफेन्डरले दिएको ब्याक पासलाई मार्टिनले चलाखीपुर्ण तरिकाले भेटाउदै खाली पोस्टमा गोल गर्न सफल भएका थिए । ८१औं मिनेटमा अनिलले व्यक्तिगत दोस्रो तथा टिमका लागि चौथो गोल गरेपछि थ्री स्टारले ४–० को फराकिलो अग्रता बनायो ।

मोविन राईले अनिल गुरुङलाई नै डिबक्समा लडाएपछि थ्री स्टारले पेनाल्टीको मौका पाएको थियो । जसलाई अनिल आफैले सदुपयोग गरे । ८५औं मिनेटमा अनिलले ह्याट्रिक पुरा गर्दै थ्री स्टारको जित पक्का गरे । अनिलले मार्टिनको पासलाई सदुपयोग गरेका थिए । ५–० ले पछि परेपछि सिक्किमले दुई गोल फर्काएपनि हार टार्न सकेन ।

८९औं मिनेटमा सोनामले गोल गर्दै खेललाई ५–१ मा झारे । इन्ज्युरी समयको थप गरिएको तेस्रो मिनेटमा ओन छिरिङ लेप्चाले गोल गर्दै खेललाई ५–२ मा ल्याएपनि हार टार्न सकेन । ह्याट्रिक कर्ता अनिल नै खेलको म्यान अफ दि म्याच घोषित भए । उनले ५ हजार रुपैयाँ पाए ।