काठमाडौं (हाम्रो खेलकुद) – तिलोत्तमा गोल्डकपको २१ औ संस्करणको विजेता दाउफिन्सले सोमबार फाइनल खेल जितेपछि पुरस्कार राशी नगद मै पाएको छ ।

प्रतियोगिता आयोजक रुपन्देही जिल्ला फुटबल संघले विजेतालाई ८ लाख ८० हजार रुपैयाँ नगद नै प्रदान गरेको एन्फा रुपन्देहीका अध्यक्ष दिर्घ बहादुर केसी(कुमार)ले जानकारी दिए । यसअघि पोखरामा सञ्चालन भएको मनकामना केबुलकार पोखरा कप फुटबल प्रतियोगिता २०७५ को समेत विजेता रहेको दाउफिन्सले अहिले सम्म उक्त प्रतियोगिताको भने पुरस्कार रकम नपाएको बुझिएको छ । यता धरानमा भएको बुढासुब्बा गोल्डकपको पुरस्कार राशी पनि दाउफिन्सले उपाधि जित्नेबितिकै पाएको थियो ।

दुई साता अघि अखिल नेपाल फुटबल संघ कास्कि द्धारा सञ्चालित उक्त फुटबलको फाईनलमा विभागीय टिम एपीएफलाई १-० ले पराजित गर्दै ७ लाख ५५ हजार रुपैयाँ पुरस्कार सहित कप उठाएको दाउफिन्सले नगद पुरस्कार नपाई चेक पाएका थिए । दाउफिन्सलाई आयोजकले पछाडीको मिति राखी चेक दिएको थिए । दाउफिन्सका प्रबन्धक सुगन तन्डुकारका अनुसार आयोजकले पैसा नउठेका कारण पछिल्लो मितिको चेक दिएको बताए ।

‘अहिले पैसा हरु सबै उठेको छैन । स्पोन्सर बाट पनि उठन बाँकी छ भन्दै ब्याक डेट चेक दिन्छौ भन्नु भयो । हामीले सरसल्लाह गरी समझदारीमा ब्याक डेटको चेक लियौ । खबर गरे पछि बैंकबाट सटही गर्नु होला भन्नु भएको छ प्रतिक्षामा छौं,’ तन्डुकारले भने । पोखरामा उपविजेता बनेको एपीएफले पनि पुरस्कार बापतको रकम अहिले सम्म प्राप्त नगरेको बुझिएको छ । पोखरामा भएको प्रतियोगिताको पुरस्कार वितरणमा एन्फा अध्यक्ष कर्मा छिरिङ शेर्पा नै सामेल रहेका थिए । शेर्पा आफैंले दुई दिनअघि दाउफिन्स एन्फाले मान्यता नदिएको टोली रहेको बताएका थिए ।

यो पनि : ‘दाउफिन्सलाई मान्यता दिएका छैनौं’ – एन्फा अध्यक्ष शेर्पा