काठमाडौं (हाम्रो खेलकुद) – दोस्रो संस्करणको सहिद स्मृति मकवानपुर गोल्डकप फुटबल प्रतियोगितालाई भूगर्भ सिमेन्टले मुख्य प्रयोजन गरेको छ ।

आयोजक मकवानपुर जिल्ला फुटबल संघले बुधबार दोस्रो संस्करणको मकवानपुर गोल्डकपको लागि भूगर्भ सिमेन्टसँग एक वर्षको लागि मुख्य प्रायोजन गरेको हो । सम्झौतामा मकवानपुर जिल्लाका अध्यक्ष टीकाराम लामा र भूगर्भ सिमेन्टका अध्यक्ष पिताम्वर गैरेले हस्ताक्षर गरे । सम्झौताअनुसार भूगर्भ सिमेन्टले प्रतियोगिताका लागि १० लाख रूपैया उपलब्ध गराउने छ । यससँगै प्रतियोगिताको नाम भूगर्भ सहिद स्मृति मकवानपुर गोल्डकप रहने छ ।

सम्झौतापछि भूगर्भका अध्यक्ष पिताम्वर गैरेले सामाजिक दायित्वका रुपमा फुटबलसँग जोडिन पाएको खुशी व्यक्त गर्दै आगमी वर्षहरुमा प्रतियोगितालाई साथ दिने प्रतिवद्धता व्यक्त गरे । उनले करिव डेढ वर्षअघिबाट उत्पादन सुरु गरेको सिमेन्ट अहिले बजारमा ५ ब्रान्डमध्ये ३ उत्पादन बजारमा आएको जानकारी गराए । यस्तै मकवानपुरका अध्यक्ष टीकाराम लामाले साथ दिएकोमा धन्यवाद व्यक्त गरे । उनले अखिल नेपाल फुटबल संघ (एन्फा) को विशेष सहयोग रहेको पनि बताए ।

प्रतियोगितामा ‘ए’ डिभिजनका १० टोलीको सहभागिता रहने आयोजकले जनाएको छ । जसमा मनाङ–मस्र्याङ्दी, थ्री स्टार, त्रिभुवन आर्मी क्लब, नेपाल पुलिस क्लब, नेपाल एपीएफ क्लब, सिएमजी क्लब संकटा, च्यासल युथ क्लब, सरस्वती क्लब, एनआरटी, हिमालयन शेर्पा, राष्ट्रिय जागृति क्लब सिमरा र आयोजक मकवानपुर–११ क्लबमध्येबाट १० टोलीको सहभागिता रहनेछ । प्रतियोगिताको विजेताले ८ लाख रूपैया हात पार्नेछन् । दोस्रो हुनेले ४ लाख रूपैयाँ हात पार्नेछन् । प्रतियोगिताको सर्वाेत्कृष्ट खेलाडीले ५० हजार रूपैयाँ हात पार्ने आयोजकले जनाएको छ ।

व्यक्तिगत विधाका विजेताले जनही २०–२० हजार पाउनेछन् । हरेक खेलको म्यान अफ दि म्याचले १० हजार रूपैयाँ पाउनेछ । प्रतियोगिता २९ फागुनबाट ९ चैतसम्म हेटौडा वनविज्ञान प्रतिष्ठानको खेल मैदानमा हुनेछ । मैदान तयारको कार्य अघि बढिसकेको र २५ गतेसम्म सम्पूर्ण तयारी पुरा आयोजकले जनाएको छ । प्रतियोगितालाई हेटौंडा उपमहानगरपालिकाले ८ लाख रूपैयाँ उपलब्ध गराएको छ ।