पोखरा (हाम्रो खेलकुद) – विभागीय टोली त्रिभुवन आर्मी क्लब १७ अौं अाहा रारा गोल्डकपको फाइनलमा प्रवेश गरेको छ । शुक्रबार पोखरा रंगशालामा दाउफिन्स फुटबल क्लबलाई १-० ले पराजित गर्दै अार्मीले फाइनल भिडन्त पक्का गरेको हो ।

खेलको १३ अौं मिनेटमा टेकबहादुर बुढाथोकीले अार्मीलाई अग्रता दिलाए । दायाँ विङबाट अाएको क्रसलाई टेकले ६ यार्डमा बक्सभित्रबाट हेडरमार्फत गोलमा परिणत गरेका थिए । पहिलो हाफको अन्त्यतिर अार्मीका कप्तान भरत खवासको प्रहारलाई दाउफिन्सका गोलरक्षक प्रिसोले विफल पारे ‌।

दोस्रो हाफमा पनि खेल प्रतिस्पर्धात्मक नै रहयो । अार्मीले लगातार अाक्रमण बुन्दा काउन्टर अट्याकमा भर परेको दाउफिन्सले अार्मीलाई समस्या दिन सकेन । ६३ अौं मिनेटमा नवयुग श्रेष्ठको प्रहारले पोस्टको दिशा लिन सकेन ।

७४ अौं मिनेटमा भरत खवासले बलमा उत्कृष्ट नियन्त्रण गर्दै तीन डिफेन्डरलाई छलाउँदै वन भर्सेस वनमा गरेको प्रहार गोलरक्षकले मुस्किलले बचाए । ८५ अौं मिनेटमा दाउफिन्स १० खेलाडीमा समेटियो । डेम्बा अोवुनाले विकास तामाङलाई ट्याकल गरेपछि रेफ्रिले उनलाई दोस्रो पहेंलो कार्ड देखाए ।

अार्मीले अब प्रतियोगिताको फाइनलमा शनिबार रुस्लान थ्री स्टारको सामना गर्नेछ । थ्री स्टारले बुधबार एपीएफलाई टाइब्रेकरमा पराजित गर्दै उपाधि भिडन्त तय गरेको थियो ।