एजेन्सी – घरेलु मैदानमा रियल बेटिसलाई पराजित गर्दै भ्यालेन्सियाले स्पेनिस कोपा डेल रेको फाइनलमा स्थान पक्का गरेको छ । बिहीबार रातिको खेलमा भ्यालेन्सिया १-० ले विजयी रहँदै समग्रमा ३-२ को जित दर्ता गर्न सफल रहयो ।
भ्यालेन्सियाका लागि फरवार्ड रोड्रीगो मोरेनोले ५६ औं मिनेटमा गरेको गोल नै निर्णायक सावित भयो । त्यसअघि पहिलो लेग २-२ को बराबरीमा सकिएको थियो । भ्यालेन्सियाले अब उपाधिका लागि बार्सिलोनाको सामना गर्नेछ । बार्सिलोनाले रियल म्याड्रिडलै समग्रमा ४-१ ले पराजित गर्दै फाइनल यात्रा तय गरेको थियो ।
बार्सिलोनाले पछिल्लो चार सिजन लगातर यस उपाधिमा कब्जा जमाउँदै आएको छ । भ्यालेन्सियाले पछिल्लोपटक सन् २००८ मा यस उपाधि जित्दा टोलीमा रोनाल्ड कोम्यान प्रशिक्षक र डेविड सिल्भा, जुआन माटा, डेविड भिल्ला लगायत खेलाडी सम्मिलित रहेका थिए । प्रतियोगिताको फाइनल २५ मेमा हुनेछ ।
