एजेन्सी – जर्मन बुन्डेसलिगा अन्तर्गत शुक्रबार बोरुसिया डर्टमुन्ड अंक तालिकाको पुछारतिर रहेको अग्स्बर्गसँग पराजित भएको छ । दक्षिण कोरियाली फरवार्ड जी दोङ वोनले २ गोल गरेपछि डर्टमुन्ड पराजय बेहोर्न बाध्य भयो ।

डर्टमुन्डकै पूर्व खेलाडी रहेका जीले खेलको २४ औं मिनेटमा गोल गर्दै घरेलु टोलीलाई अग्रता दिलाएका थिए । दोस्रो हाफको ६७ औं मिनेटमा जीले व्यक्तिगत दोस्रो गोल गर्ने क्रममा गोलरक्षकलाई चिप गर्दै उत्कृष्ट फिनिसको नमुना प्रस्तुत गरे । डर्टमुन्डका लागि खेलको १० मिनेट समय बाँकी रहँदा पाको अल्कासेरले गोल गरेपनि जितको लागि पर्याप्त भने रहेन ।
यस हारसँगै डर्टमुन्डले अंक तालिकाको शीर्ष स्थानमा ६ अंकको अग्रता लिने अवसर गुमाएको छ । दोस्रो स्थानमा रहेको बायर्न म्युनिखलाई अब अंक बराबरी गर्ने अवसर रहेको छ । डर्टमुन्डले २४ खेलमा ५४ अंक जोडेको छ । बायर्नको २३ खेलमा ५१ अंक छ । शनिबार हुने खेलमा बायर्नले तेस्रो स्थानको बोरुसिया मोन्चेन्ग्लाडबाकसँग खेल्नेछ ।