विराटनगर (हाम्रो खेलकुद) – महिला साफ च्याम्पियनसिपको पहिलो सेमिफाइनलमा नेपालले श्रीलंकाको सामना गर्दैछ । नेपाली टोलीका प्रशिक्षक हरि खड्काले बंगलादेशविरुद्धकै पहिलो रोजाईलाई श्रीलंकाविरुद्ध उत्रार्ने तयारी गरिरहेका छन् ।
गोलकिपर एन्जिला तुम्बापो सुब्बा छिन् भने डिफेन्समा गीता राना, हिराकुमारी भुजेलसँगै मनमाया लिम्बू र पुनमले उनीहरुलाई साथ दिनेछन् । मिडफिल्डमा दिपा राई र रेनुका नगरकोटे रहनेछन् ।
विङ्गमा अनिता बस्नेत र मन्जलीले आक्रमणलाई सहयोग दिनेछन् । कप्तान निरु थापा र सावित्रा भण्डारीले अग्रपक्तिको मोर्चा सम्हाल्नेछन् ।
महिला साफ च्याम्पिययनसिपमा नेपाल र श्रीलंकाले दोस्रो पटक एकअर्काको सामना गर्दैछन् । खेल आज बिहान ११ः०० बजे सुरु हुँदैछ । सेमिफाइनलका लागि दुवै टोली रंगशालामा वार्म अप सुरु गरिसकेका छन् ।
विराटनगरको सहिद रंगशालामा जारी पाँचौं संस्करणको च्याम्पियनसिपमा नेपाल र भारत दुई अपराजित टोली हुन् । यी दुई टोलीलाई नै प्रतियोगिताको मुख्य दाबेदारका रुपमा हेरिन्छ । भारत च्याम्पियनसिपको सर्वाधिक सफल टोली हो ।
यसअघिका सबै चार संस्करण भारतले जितेको थियो । त्यसपछिको सफल टोली नेपाल हो । नेपालले सुरुवाती तीन संस्करणमा भारतसँग फाइनल खेलेको थियो । सन् २०१६ को चौथो संस्करणमा भने नेपाल सेमिफाइनलबाट अघि बढ्न सकेन । जहाँ नेपाल भारतसँगै पराजित भएर प्रतियोगिताबाट बाहिरिएको थियो ।
नेपाल पाँचौं पटक साफ च्याम्पियसिपको सेमिफाइनल खेल्ने तयारीमा रहेको छ । पछिल्लो संस्करणमा बाहेक नेपालले सुरुवाती तीन संस्करणको सेमिफाइनलमा गोल खानु परेको थिए । पहिलो र दोस्रो संस्करणको सेमिफाइनलमा समान ३–० को जित निकालेको नेपालले तेस्रो संस्करणमा भने बंगलादेशलाइ १–० को झिनो अन्तरले हराएको थियो ।
भारतको सिगुढीमा भएको पछिल्लो संस्करणमा भने नेपाल भारतसँग ३–१ ले पराजित भएको थियो । आजै हुने अर्को सेमिफाइनलमा भारत र बंगलादेशले एक अर्काको सामाना गर्नेछन् ।
