विराटनगर (हाम्रो खेलकुद) – पाँचौ संस्करणको महिला साफ च्याम्पियनसिपको फाइनलमा शुक्रबार घरेलु टोली नेपालले यसअघिका चारै संस्करणको च्याम्पियन भारतसँग प्रतिस्पर्धा गर्दै छ ।

फाइनल खेल दिउसो ३ बजेपछि विराटनगरस्थित सहिद रंगशालामा शुरु हुनेछ ।

महिला फुटबलमा भोलिको फाइनल खेल नेपाल र भारतबीचको ११औं खेल हुनेछ । यसअघि नेपाल र भारतले अहिलेसम्म १० खेलमा प्रतिस्पर्धा गरेका छन् । जसमध्ये १ खेलमा जित, २ बराबरी र ७ खेलमा हारको इतिहास छ ।

नेपालले भारतसँग साफ च्याम्पियसिपमा ४ चार खेल खेल्दा सबैमा हार बेहोरेको थियो । जसमा ३ खेल फाइनल र १ खेल सेमिफाइनल रहेको छ ।

यस्तै दक्षिण एसियाली खेलकुदमा चार खेल खेल्न नेपालले ३ खेलमा हार र १ खेलमा बराबरीको नतिजा निकालेको थियो ।

पछिल्लोपटक नेपालले सन् २०२० मा जापानमा हुने टोकियो ओलम्पिकको लागि एसिया छनोटको पहिलो चरणमा भारतलाई १–१ को बराबरीमा रोक्न सफल हुदा गत महिना भारतमा भएको महिला गोल्डकपमा नेपालले २–१ को सनसनीपुर्ण जित हात पारेको थियो । जुन नेपालले १०औं खेलमा हात पारेको पहिलो जित थियो ।

सन् २०१० बाट शुरु भएको महिला साफ च्याम्पियनसिपको पहिलो संस्करणमा नेपाल फाइनलमा भारतसँग १–० ले पराजित भएको थियो । त्यतिबेला सस्मिता मल्लिकले निर्णायक गोल गरेकी थिइन् ।

२०१२ को फाइनलमा नेपाल भारतसँग ३–१ ले निराश बनेको थियो । नेपालकी दीपा अधिकारीले एक गोल गर्दा भारतकी सुप्रिया राउटरे, बेमवेम देवी र कमलादेवीले गोल गरेकी थिइन् ।

सन् २०१४ को फाइनलमा भने नेपाल ६–० ले निराश बनेको थियो । बालादेवीले ह्याट्रिसहित द्धर गोल गर्दा कमलादेशी र रोमी देवीले समान १–१ गोल गरेकी थिइन् ।

२०१६ मा भने नेपाल सेमिफाइनलमा रोकिदा ३–१ ले निराश बनेको थियो । नेपाली सावित्रा भण्डारीले एक गोल गर्दा भारतकी बालादेवी, सस्मिता मल्लिक र इन्दुमतिले गोल गरेकी थिइन् ।