अर्जुन कार्की, बागलुङ

जापानमा भएको कोपा पुमा टोरेरस कप फुटबलमा नेपाली टोली क्वाटरफाइनलबाट बाहिरिदै नेपाल फर्केको छ । नेपालको यू–१२ टोलीले प्रतिस्पर्धा गरेको ९ खेलमा ४ मा बराबरी ३ मा जित र २ मा हार बेहोर्दै क्वाटरफाइनलबाट बाहिरिदै नेपाली टोली घर फर्केको हो ।

कास्की जिल्ला फुटबल संघले नेपालको १८ जिल्लाबाट १२ वर्षमुनीका १२ जना खेलाडीहरु छनोट गर्ने क्रममा ९ जिल्लाका मात्र खेलाडीहरु छनोट भएका थिए । उक्त प्रतियोगितामा भाग लिनको लागि बागलुङबाट पहिलो पटक टिममा स्थान बनाएका १२ वर्षिय खेलाडी विविध थापाले प्रतियोगिताभर उत्कृष्ट खेल प्रस्तुत गरेका थिए ।

नेपालले खेलेका सबै खेलमा सहभागी डिफेन्डर थापाले खेल अवधिभर उत्कृष्ट खेल प्रस्तुत गर्दै ३ गोल समेत गरे । उनले ९ खेलमा ३ गोल गरेका हुन् । उनले तीन पटक नै कर्नर बललाई जालि चुमाउँदै आफ्नो नाममा गोल दर्ता गरेका थिए । बागलुङका थापाले नुमाजु, ग्रिन टाउन र ओमियासँगको खेलमा गोल गरेका थिए ।

कास्की जिल्ला फुटबल संघको संयोजन र जापानको फनरुट्स एकेडेमीको सहकार्यमा नेपालबाट १२ वर्षसम्मका बालबालिकाहरुले प्रतियोगितामा सहभागिता जनाउँदै छ । डिफेन्डर पोजिसनमा खेल्ने थापाले मिडफिल्डमा समेत उत्कृष्ट खेल प्रस्तुत गर्न सक्छन् । नेपालको टिमबाट जापानको पुमा टोरेरस कप फुटबल खेलेका थापा जिल्लाकै पहिलो खेलाडी हुन् । जापानमा उत्कृष्ट खेल प्रस्तुत गरेपछि उनलाई जिल्लाको उदाउँदो खेलाडीको रुपमा हेरिएको छ ।

प्रतियोगितामा नेपाली टिमलाई सहभागिता गराउनको लागि मुख्य भुमिका खेलेका नेपालका पूर्व राष्ट्रिय खेलाडी बसन्त गौचनले नेपाली खेलाडीहरुको प्रदर्शनले आफुलाई खुसी लागेको बताएका थिए । टिमलाई प्रशिक्षण समेत दिएका गौचनले नेपाली खेलाडीहरुले राम्रो प्रशिक्षणको मौका पाएमा अझै राम्रो गर्न सक्ने बताए ।

बागलुङका खेलाडीहरुले नेपालको उमेर समुहको राष्ट्रिय टिममा स्थान बनाउँदै खेल प्रस्तुत गरेपनि अहिलेसम्म सिनियर राष्ट्रिय टोलीमा स्थान बनाउन सकेका छैनन् । थापाले आफूले पछि नेपालको जर्सी लगाएर देशको लागि खेल्ने सपना देखेको बताएका छन् ।

थापा जिल्ला फुटबल संघ बागलुङका उपाध्यक्ष विकास थापाका जेठा छोरा हुन् । उपाध्यक्ष थापा पनि पहिले जिल्लाबाट खेल्दा डिफेन्डरको भुमिकामा खेल्ने गरेका थिए । छोराले आफ्नो पाइला पछाएकोमा खुसी लागेको उपाध्यक्ष थापाले बताए ।

आफूले नेपालको जर्सी लगाएर देशको लागि खेल्ने सोच बनाएपनि उक्त सपना पुरा नभएको दुःख लाग्ने गरेपनि अहिले छोराको प्रगतिले आफ्नो अधुरो सपना छोराले पूरा गर्न सक्ने थापाले बताए । ‘छोराले राम्रो खेल प्रस्तुत गरेको छ त्यसमा धेरै खुसी लागेको छ,’ थापाले भने–,आफ्नो सपना पुरा नभएपनि छोराको सपना पुरा गर्नको लागि उसलाई खेल प्रति लाग्न आफुले सधै साथ दिनेछु ।’