एजेन्सी – वाटफोर्डमाथि कठिन जित निकाल्दै आर्सनल इंग्लिस प्रिमियर लिग फुटबलमा चौथो स्थानमा उक्लिएको छ ।
वाटफोर्डको मैदानमा सोमबार राति भएको खेलमा आर्सनलले १० खेलाडीमा समेटिएको वाटफोर्डमाथि १–० को संघर्षपुर्ण जित निकालेको हो । खेलको १०औं मिनेटमा पिएरे इमरिक औबामियाङले गोल गर्दै आर्सनलाई अग्रता दिलाएका थिए ।
त्यसलगत्तै घरेलु टोली १० खेलाडीमा समेटिएको थियो । वाटफोर्डका कप्तान ट्रोए डेनीले आर्सनलका लुकास टोरेरालाई एलबो प्रहार गरेपछि रेफ्री क्रेइग पासनले सोझै रातो कार्ड देखाएका थिए ।
त्यसपछि आर्सनलले त्यो फाइदा उठाउन सकेन । जितसँगै आर्सनल प्रिमियर लिगको चौथो स्थानमा उक्लिएको छ ।
आर्सनलको ३३ खेलबाट ६६ अंक पुगेको छ । आर्सनलको एक खेल बढी खेलेको चेल्सीसँग अंक बराबरी भएपनि गोल अन्तरमा आर्सनल अघि बढेको हो । ८५ अंकसहित लिभरपुल शीर्ष तथा म्यानचेस्टर सिटी ८३ अंक जोडेर दोस्रो स्थानमा रहेको छ ।
