एजेन्सी – लन्डन क्लब चेल्सीले आउँदो समर ट्रान्सफरमा ब्राजिल तथा स्पेनिस क्लब बार्सिलोनाका प्ले मेकर फिलिपे कौटिन्होलाई अनुबन्ध गर्ने प्रयास गरेको छ ।

चेल्सीले बेल्जियन फरवार्ड इडेन हजार्डको विकल्पमा कौटिन्होमाथि पहिलो नजर राखेको हो । हजार्ड यसै समरमा स्पेनिस महारथी रियाल म्याड्रिडमा अनुबन्धन हुने सम्भावना बढेको छ । रियालमा नयाँ प्रशिक्षक जिनेदिन जिदान आएसँगै उनले हजार्डलाई अनुबन्ध गर्ने प्रयास जारी राखेका छन् ।

उनलाई अनुबन्ध गर्न असफल भए चेल्सीले फ्रेन्च क्लब लिलेका निकोलस पेपेलाई अनुबन्ध गर्ने योजना बनाएको छ । पेपेलाई अर्काे इंग्लिस क्लब लिभरपुल, म्यानचेस्टर युनाइटेड र एभर्टनले पनि अनुबन्ध गर्ने योजना बुनेका छन् ।

अघिल्लो सिजन बार्सिलोना आएका कौटिन्होले पहिलो रोजाईमा कमै मात्रामा मौका पाएका छन् । टेलिफुटका अनुसार हजार्डको विकल्पमा कौटिन्हो चेल्सीमा सबैभन्दा उत्तम हुने उल्लेख गरेका छन् ।

‘हजार्ड र कौटिन्होको गोल, असिस्ट र खेल्ने शैली एकै छ । हजार्डले जति पनि गोल र असिस्ट गरेका छन् । त्यति नै क्षमता कौटिन्होमा छ ।’ टेलिफुटमा उल्लेख छ ।

कौटिन्हो गत सिजनको जनवरी ट्रान्सफरमा १४६ मिलियन पाउन्डमा लिभरपुलबाट बार्सिलोना पुगेका थिए । बार्सिलोनाले पनि कौटिन्होलाई बेच्न चाहेका कारण उनी प्रिमियर लिगमा अनुबन्ध हुन सक्नेछन् ।