एजेन्सी – युरोपेली च्याम्पियन्स लिगमा डच टोली आयाक्सलाई सेमिफाइनलसम्म पुर्याएका युवा कप्तान माथिस डे लिग्ट क्याटलान क्लब बार्सिलोना जाने भएका छन् ।

डे लिग्टको ट्रान्सफरलाई लिएर दुई क्लबबीच अनुबन्धन रकमबारे सम्झौता भइसकेको छ । नेदरल्यान्डका युवा डिफेन्डरलाई क्लबमा भित्र्याउन बार्सिलोनाले ७० मिलियन युरो खर्चने भएको छ । च्याम्पियन्स लिग सेमिफाइनलमा टोटेनहमसँग पराजित भएपछि आयाक्सका कार्यकारी अधिकृत एडविन भान डर सारले डे लिग्टले क्लब छाड्ने प्रष्ट पारेका थिए । म्यानचेस्टर युनाइटेडले उनलाई भित्र्याउने प्रस्ताव गरेपनि डे लिग्ट आफैंले बार्सिलोना रोजेका हुन् ।

‘अब केहि खेल डे लिग्टका लागि आयाक्सको जर्सीमा अन्तिम खेल हुने छन् । उनी सायद इंग्ल्यान्ड वा स्पेनको क्लबमा जानेछन्,’ भान डर सारले भने । युवा अवस्थामै राष्ट्रिय टोलीको भरपुर अनुभव बोकेका डे लिग्टलाई विश्वकै सर्वोत्कृष्ट उदीयमान खेलाडी मानिएको छ । उनले १९ वर्षको उमेरमा नै सेमिफाइनलसम्म टोलीको कप्तानी गरेका हुन् ।

यसअघि नै बार्सिलोनाले आयाक्सका अर्का युवा प्रतिभा फ्रान्की डे जोङलाई टोलीमा समेटीसकेको छ । फ्रान्की यसै सिजनको अन्त्यमा आयाक्स छाडेर बार्सिलोना प्रस्थान गर्नेछन् । डे लिग्ट र डे जोङको पैसा खर्च गरेर आयाक्सले आफ्नो टोलीलाई थप बलियो बनाउने लक्ष्य राखेको छ ।