काठमाडौं (हाम्रो खेलकुद) – मिनेर्भा पन्जाब फुटबल क्लबका युवा खेलाडी थोइबा सिंह मोइराङथेमले मनाङ मर्स्याङदी विरुद्ध गोल गर्दै एएफसी कप प्रतियोगितामा कीर्तिमान रचेका छन् ।
एएफसी कप अन्तर्गत बुधबार एन्फा कम्प्लेक्समा भएको समूह चरणको चौथो खेल मनाङ मर्स्याङदी क्लब र मिनेर्भा पन्जाव फुटबल क्लबले १-१ को बराबरीमा सकियो । उक्त खेलमा मिनेर्भालाई अग्रता दिलाएका थोइबा सिंह मोइराङथेमले एएफसी कपमा गोल गर्ने सबैभन्दा कम उमेरको खेलाडी बन्दै कीर्तिमान रचेका छन् ।
थोइबाले खेलको ४० औं मिनेटमा गोल गर्दै मिनेर्भालाई अग्रता दिलाएका थिए । उनले मनाङका गोलरक्षक विशाल श्रेष्ठले बचाए फर्केपछि आएको रिबाउन्ड बललाई गोलमा परिणत गरेका थिए । थोइबाको उमेर १६ वर्ष ५ महिना ३ दिन मात्र रहेको छ ।
थोइबाले गतवर्ष नेपालमा भएको साफ यू-१६ प्रतियोगितामा भारतको प्रतिनिधित्व गर्दै उपाधि जितेका थिए । नेपाललाई फाइनलमा हराउँदै भारत च्याम्पियन भएको थियो ।
