टुरिन (एजेन्सी)– टोटेनहम हट्सपरका प्रशिक्षक माउरिसियो पोचेटिनो युभेन्ट्सको भावी प्रशिक्षकका रुपमा नियुक्त हुने बलियो सम्भावना रहेको बताइएको छ । जारी सिजनको अन्त्यसँगै वर्तमान प्रशिक्षक मासिमिलियानो एलिग्री पदबाट अलग हुने युभेन्ट्सले प्रष्ट पारिसकेपछि पोचेटिनोको चर्चा सुरु भएको हो ।

५१ वर्षे इटालियन एलिग्रीको नेतृत्वमा युभेन्ट्सले पाँच पटक इटालियन लिग जित्नुका लागि ४ वटा कोपा इटालीया उपाधि जितेको थियो । त्यस्तै सन् २०१५ र २०१७ मा टोली च्याम्पियन्स लिगको उप विजेता रहेको थियो ।

क्लबले विज्ञप्ती जारी गर्दै भनेको थियो, ‘ एलिग्री २०१९/२०२० को सिजनका लागि युभेन्ट्सको बेन्चमा हुने छैनन् ।’ प्रशिक्षक एलिग्री र क्लबका अध्यक्ष आन्द्रेय एग्निलीले शनिबार संयुक्त रुपमा पत्रकार सम्मेलन गर्ने बताइएको छ ।

जारी सिजनमा ६ खेल बाँकी रहँदै लिग च्याम्पियन बनेको युभेन्ट्सबाट एलिग्री अलग हुने यसअघि नै अपेक्षा गरिएको छ । टोलीले लगातार आठौं पटक सिरिए उपाधि जितिसकेको छ ।

एन्टोनियो कोन्टे र पेप ग्वार्डिओलालाई पनि एलिग्रीको उत्तराधिकारीको रुपमा हेरिएको छ । तथापी पोचेटिनोको सम्भावना सबैभन्दा बढी रहेको बताइएको छ । इटालियन सञ्चारमाध्यमका अनुसार युभेन्ट्सले सिजन सकिएपछि पोचेटिनोलाई सम्झौताको लागि प्रस्त्वव गर्नेछ ।

पोचेटिनो आफैं पनि सिजनको अन्त्यसँगै टोटेनह्याम छाड्न मनस्थितिमा रहेको बताइएको छ । उनको नेतृत्वमा टोटेनह्याम यसपटक च्याम्पियन्स लिगको फाइनलमा पुगेको छ । जुन १ मा हुने फाइनलमा टोटेनहमले लिभरपुलको सामना गर्नेछ ।