एजेन्सी – जर्मन च्याम्पियन बायर्न म्युनिख म्यानचेस्टर सिटीका युवा विंगर लेरोय सानेलाई क्लबमा अनुबन्धन गर्न इच्छुक देखिएको छ । जर्मनीको राष्ट्रिय टोलीबाट खेल्दै आएका साने साल्काबाट सिटि आएका हुन् ।

यसै सिजन बायर्नका दुई अनुभवी विंगरद्वय आर्जेन रोबेन र फ्रान्क रिबेरीले क्लब छाडेपछि बायर्न नयाँ खेलाडीको खोजीमा छ । क्लबले त्यसयता कुनै खेलाडी अनुबन्धन गरेको छैन । डर्टमुन्डले खेलाडी अनुबन्धन गरिसक्दा बायर्नले भने अझै ट्रान्सफर बजारमा सक्रियता देखाएको छैन । बायर्नले सानेलाई आफ्नो प्रमुख खेलाडीको रुपमा अनुबन्ध गर्ने प्रयास गर्ने बुझिएको छ ।

२३ वर्षीय सानेले म्यान्चेस्टर सिटीमा तीन सिजन बिताइसकेका छन् । यसबीचमा उनले २ पटक प्रिमियर लिग उपाधि पनि जिते । पछिल्लो समय पेप गुआर्डीओलासँग राम्रो सम्बन्ध नरहेको कारण पनि सानेले क्लब छाड्ने सम्भावना रहेको छ । सानेले पहिलो रोजाइमा खेल्न संघर्ष गरिरहेका छन् । बायर्नमा सानेले सुरुवाती रोजाईमा स्थान पाउने पक्काजस्तै छ ।

क्लबले लुकास हर्नान्डेज र बेन्जामिन पाभार्डलाई अनुबन्ध गरिसेकेको छ । आक्रमणमा भने नयाँ खेलाडी खोज्न बायर्न बजार पस्ने क्रम सुरु हुनेछ । सन् २०२१ सम्म सिटीसँग सम्झौता गरेका सानेलाई अनुबन्ध गर्न सके बायर्नको आक्रमण सुदृढ हुनेछ ।