म्याड्रिड (एजेन्सी)– गत साता रियल म्याड्रिडले नयाँ खेलाडी इडेन हाजार्डलाई समर्थकमाझ सार्वजनिक गर्यो । उक्त समयमा बेर्नाबेउमा ५० हजार समर्थकले केलियन एमबाप्पेलाई ल्याउनुपर्ने माग गर्दै चर्को अवाज गरिरहँदा रियल म्याड्रिडका प्रशिक्षक जिनेदिन जिदान मुस्कुराए ।

त्यो माहौलले क्लबका अध्यक्ष फ्लोरेन्टिनो पेरेजमाथि दबाब परेको थियो । त्यहाँ त्यत्रो दर्शकको उपस्थिति भने चेल्सीबाट आएका इडन हाजार्डलाई सार्वजनिक गर्ने कार्यक्रम थियो । जिदानलाई थाहा छ उनले पेरिस सेन्ट जर्मेन (पिएसजी) का एम्बाप्पेलाई ल्याउन सम्भव छैन । तर उनले पाउल पोग्बा भित्राउने सम्भावना भने अझै छाडेका छैनन्

अघिल्लो सिजनको अन्त्यतिर क्लब सम्हालेयता जिदानले टोलीलाई पूर्न निर्माण गर्ने योजनामा छन् । जिदानलाई पुनः रियलमा फर्कन कठिन थियो । क्लबको योजनालाई किनारामा राख्दै जिदानले सिजनको सुरुवातमा क्लब छाडेका थिए ।

त्यति बेला उनलाई थाहा थियो क्रिस्टियानो रोनाल्डो बेचिदै छन् भन्ने । रोनाल्डोको ठाँउ लिने खेलाडी अर्को आउने सम्भावना कम देखिएको थियो । पछिल्लो सिजन क्लबको ठूलो सम्झौता भनेको थिबाउट कोर्टुवा थिए । च्याम्पियन्स लिग लगातार तीन पटक जितेपछि जिदानले क्लबलाई नयाँ संरचना दिने सोच बनाएका थिए । तर, त्यस्तो हुन सकेन ।

अहिले फेरि जिदान रियलका प्रशिक्षक बनेका छन् । एक वर्षभन्दा कम समयमा उनले क्लबमा पुनरागमन गरेका थिए । क्लबले उनलाई जस्तो चाहन्छन् त्यस्तै क्लब बनाउने छुट दिएको छ । उनले जे चाहन्छन् क्लबले त्यसका लागि प्रयास गर्नेछ । जिदानले नाभास भन्दा कोर्टुवामाथि विश्वास गरेका छन् । भलै त्यसमा क्लबको फरक धारणा छ ।

जिदान ग्यारेथ बेललाई आफ्नो टोलीमा राख्न चाहदैनन् । कारण, पछिल्लो सिजन पनि बेलको प्रदर्शन राम्रो हुन सकेन । ठूलो रकममा सम्झौता गरेर पनि उनले उच्च प्रदर्शन गर्न सकिरहेका छैनन् । जिदान नयाँ सम्झौता गरेर भएपनि सर्जियो रामोसलाई राख्न चाहन्छन् । तर, क्लब भने ३३ वर्षे रामोससँग नयाँ सम्झौता गर्ने पक्षमा खासै देखिदैन ।