एजेन्सी – कोपा अमेरिका २०१९ अन्तर्गत समूह ‘बी’ को पहिलो खेलमा अर्जेन्टिना कोलोम्बियासँग २-० ले पराजित भयो । पहिलो खेलमा नै हार बेहोरेपछि अर्जेन्टिनाका प्रशिक्षक लिओनेल स्कालोनीले मैदानको अवस्थालाई दोष दिएका छन् ।

पहिलो हाफमा गोलरहित बराबरी रहेको खेलको दोस्रो हाफमा कोलोम्बियाले दुई गोल गर्दै जित दर्ता गरेको थियो । रोजर मार्टिनेजको उत्कृष्ट गोलमा अग्रता लिएको कोलोम्बियाले खेलको ६ मिनेट बाँकी रहँदा वैकल्पिक खेलाडी डुभान जपाटाको गोलसँगै महत्त्वपूर्ण ३ अंक हासिल गरेको थियो । खेलपछि पत्रकार सम्मेलनमा बोल्दै अर्जेन्टिनाका प्रशिक्षक लिओनेल स्कालोनीले मैदानको खराब अवस्थालाई पनि दोष दिए ।

‘ मलाई लाग्छ मैदानको अवस्था दुखलाग्दो थियो । पहिलो खेल हुँदा पनि खेल्न सहज अवस्था थिएन,’ उनले थपे, ‘ अबको दुई-तीन खेलमा मैदान खेल्नलायक हुन्छ जस्तो लाग्दैन । पहिलो खेलमा मैदानको स्थिति अझै राम्रो हुनुपर्ने थियो । विश्वस्तरीय खेलाडी खेल्ने मैदानको यो अवस्था लाजलाग्दो नै थियो ।’

अर्जेन्टिनाले सन् १९७९ यता पहिलोपटक कोपा अमेरिकाको उद्घाटन खेलमा हार बेहोरेको हो । पहिलो खेलमा पराजित अर्जेन्टिनाले दोस्रो खेलमा पाराग्वेको सामना गर्दैछ । प्रशिक्षक स्कालोनीले दोस्रो हाफमा राम्रो प्रदर्शन गरेका कारण अर्को खेलमा टोलीले नतिजा ल्याउने विश्वास व्यक्त गरे ।

यो पनि : ‘गुनासो नराखी अगाडी बढ्नुको विकल्प छैन’

यो पनि : नेपाली समयअनुसार कोपा अमेरिकाको पूर्ण खेल तालिका