एजेन्सी – स्पेनिस महारथी रियल म्याड्रिडका प्रशिक्षक जिनेदिन जिदानले फ्रान्सेली मिडफिल्डर पल पोग्बालाइ क्लबमा अनुबन्ध गर्ने माग राखेका छन् । रियलले यस सिजनका लागि ५ खेलाडी अनुबन्धन गरिसकेको अवस्थामा जिदानले अन्तिम खेलाडीको रुपमा पोग्बाको माग गरेका हुन् ।
रियलले यस सिजन चेल्सीबाट इडेन हाजार्डलाई मुख्य खेलाडीको रुपमा झन्डै ९० मिलियन पाउन्डमा अनुबन्ध गरेको हो । त्यसबाहेक सर्बियाली युवा फरवार्ड लुका जोभिच, ब्राजिलियन डिफेन्डर एडर मिलिसाओ, ब्राजिलियन विङ्गर रोड्रीगो र फ्रान्सेली डिफेन्डर फर्लान्ड मेन्डी पनि टोलीमा सामेल भइसकेका छन् । जिदानले रियलको जिम्मेवारी लिएसँगै टोलीलाई नयाँ स्वरुपमा ढाल्न खोजिरहेका छन् र त्यसका लागि पोग्बा मुख्य पात्र बन्न सक्छन् ।
जिदानले सिजन सुरु हुनुभन्दा अगाडी रियलको मैत्रीपूर्ण खेलका लागि नै सबै खेलाडी तयार पार्ने तयारी गरेका छन् । रियलले जुलाई पहिलो साता क्यानडामा मैत्रीपूर्ण खेल खेल्दैछ । जिदानले उक्त खेलअघि नै पोग्बाको ट्रान्सफर पूरा गरेर उनलाई छुट्टि दिने योजना बनाएका छन् । पोग्बालाई क्लबमा भित्र्याउने क्रममा रियलले युनाइटेडलाई हामेस रोड्रीग्वेजको पनि प्रस्ताव राख्ने सम्भावना रहेको छ । हामेस जिदानको रोजाइमा नरहेको र युनाइटेडलाई त्यसै किसिमको खेलाडी आवश्यक रहेकाले सम्झौता हुने सम्भावना रहेको छ ।
रियलले यस सिजन थुप्रै खेलाडीलाई बेच्नुपर्ने अवस्था पनि छ । हालसम्म अनुबन्धित खेलाडीमा झन्डै ३ सय ५० मिलियन पाउण्ड खर्च गरेका कारण रियलले अन्य बेन्चका खेलाडीलाई बेच्ने तयारी गरेको छ । केहि खेलाडी युरो यू-२१ च्याम्पियनसिपमा पनि सहभागी रहेकाले रियल ति खेलाडीको भाउ बढ्नेमा आशावादी रहेको छ ।
