एजेन्सी – उपाधिको दावेदार अर्जेन्टिना पहिलो खेलमै कोलम्वियासँग २–० ले स्तब्ध भएको थियो। पहिलो खेलमा हार बेहोरेसँगै अघिल्लो चरण पुग्ने सम्भावना बलियो बनाउन अर्जेन्टिनाले बिहीबार बिहान पाराग्वेसँग दोस्रो खेलमा प्रतिस्पर्धा गर्दैछ ।

सबै चार टोलीले समान एक–एक खेल खेल्दा कोलम्विया १ जितसँगै शीर्षस्थानमा रहँदा पाराग्वे र कतार समान १ अंकसहित दोस्रो र तेस्रो स्थानमा रहँदा अर्जेन्टिना अंकविहीन हुदै पुछारमा छ । पाराग्वे र कतारको बराबरीले अर्जेन्टिनाको पनि क्वाटरफाइनल पुग्ने सम्भावना रहेको छ ।

यस्तोमा अर्जेन्टिनाले आफ्नो दोस्रो खेलमा पाराग्वेसँग प्रतिस्पर्धा गर्दैछ । खेल बिहीबार बिहान ६ः१५ बजेपछि बेलो होरिजेन्टेमा हुनेछ । यि दुई टोली सन् २०१६ पछि पहिलोपटक खेल्न लागेका हुन् । सन् २०१६ मा भएको विश्वकप छनोटमा पाराग्वेले अर्जेन्टिनालाई १–० ले पराजित गरेको थियो ।

पाराग्वेमाथि सहज जित हात पार्दै अर्जेन्टिना अघिल्लो चरणमा पुग्ने सम्भावना बलियो बनाउने लक्ष्यमा हुनेछ । अर्जेन्टिनासँग आधुनिक फुटबलका महारथी लियोनेल मेस्सी रहेपनि उनलाई अन्य खेलाडीले साथ दिन नसक्दा अर्जेन्टिनाले स्वभाविक खेल पस्कन सकेको छैन ।
अर्जेन्टिनाका प्रशिक्षक लियोनेल स्कोलानीले पाराग्वेविरुद्धको खेलले नै कोपा अमेरिका कपमा अर्जेन्टिनाको भविष्य निर्धारण गर्ने बताएका छन् ।

‘हामीलाई पाराग्वेविरुद्धको खेल ‘गर या मर’ कै अवस्थामा छ । यो खेलमा जित हात पारे हाम्रो अघिल्लो चरण पुग्ने सम्भवाना बलियो रहन्छ । हामीलाई निश्चित जित आवश्यक छ ।’ स्कोलानीले भने, ‘पाराग्वेविरुद्ध हामीले पहिले गोल गर्यौं भने हाम्रो अवस्था फरक रहनेछ । हामी गोल गर्न असफल भयौ भने सोचेजस्तो नतिजा नआउन सक्दछ ।’

प्रशिक्षक स्कोलानीले पाराग्वेविरुद्ध खेलाडीले आफ्नो शतप्रतिशत दिएर खेल्नेमा विश्वस्त रहेको बताएका छन् । ‘हामीले हारबाट कोपा अमेरिका कप शुरुवात गरेका छौं । तर, खेलाडीहरुलाई अझै दुई खेल छ भन्ने पनि थाहा छ ।’ स्कोलानीले भने । अर्जेन्टिनासँग कप्तान लियोनेल मेस्सी, सर्जियो अगुइरो, निकोदलस ओटामेन्डी र गुइडो रोड्रिग्वेज मुख्य हतियार हुनेछ ।

यता, पाराग्वे अर्जेन्टिनालाई स्तब्ध पार्दै अघिल्लो चरण पुग्ने सम्भावनालाई जीवितै बनाउने लक्ष्यमा मैदान उत्रनेछ । पहिलो खेलमा कतारसँग २–० को अग्रता लिएर पनि अप्रत्यासित रुपमा बराबरीमा रोकिन पुगेको पाराग्वे अर्जेन्टिनाविरुद्ध उक्त गल्तीलाई सुधार्दै अघि बढ्ने लक्ष्यमा रहनेछ । पाराग्वेका लागि ओस्कार कारर्डाेजो र डेरलिस गोन्जालेज मुख्य हतियार हुनेछन् ।

पछिल्ला सात खेल हेर्ने हो भने पाराग्वेमाथि अर्जेन्टिना नै हावी देखिएको छ । अर्जेन्टिनाले सात मध्ये ४ खेलमा जित २ बराबरी र १ हारको नजिता निकालेको छ । सन् २०१६ मा १–० ले पराजित अर्जेन्टिना सन् २०१५ मा गोलरहित बराबरीमा रोकिएको थियो । त्यसयता यि दुई टोलीबीच खेल हुन सकेको छैन ।