उदयपुर (हाम्रो खेलकुद)- आयोजक उदयपुर –११ माथि फराकिलो जित निकाल्दै गोर्खा ब्वाइज क्लब रुपन्देही छैटौ संस्करणको रमपम उदयपुर गोल्ड कप फुटबल प्रतियोगिताको फाइनलमा प्रवेश गरेको छ ।

• 

थरुहट रंगशालामा बिहीबार भएको अन्ति सेमिफाइनलमा गोर्खा ब्वाइजले उदयपुरमाथि ४–१ को फराकिलो जित निकाल्दै उपाधिनजिक पुगेको हो ।
अब गोर्खा ब्वाइजले उपाधिको लागि शनिबार विभागीय नेपाल एपीएफ क्लबको सामना गर्नेछ ।
गोखा ब्वाइजको फराकिलो जितमा फोफानाले २ तथा सुशिल कुमार यादव र डेनिलले समान १ गोल गरे । उदयपुरका सुनिल खड्काले एक गोल फर्काए
खलेको तेस्रो मिनेटमा नै सुशिलको गोलबाट गोर्खाले अग्रता बनाएको थियो । १८औं मिनेटमा डेनिलले अग्रता दोब्बर बनायो । २२ औं मिनेटमा फोफानाले गोल गरेपछि गोर्खा ब्वाइज पहिलो हाफमै ३–० को आरामदायी अग्रतामा पुगेको थियो ।

७९औं मिनेटमा उदयपुरका सुनिल खड्काले गोल गदै घरेलु टोलीलाई खेलमा फर्काउने प्रयास गरेका थिए । तर, ८२औं मिनेटमा फोफानाले व्यक्तिगत दोस्रो गोल गर्दै टिमलाई ४–१ को जित दिलाए ।
गोर्खा ब्वाइजका पेपे म्यान अफ दि म्याच भए । उनले ७ हजार रुपैया हात पारे ।
प्रतियोगिताको विजेताले ५ लाख रुपैया हात पार्नेछन् । दोस्रो हुनेले ३ लाख हात पार्नेछन् । सर्बोत्कृष्ट खेलाडीले ५० हजार र अन्य पाँच विद्यामा २०–२० हजार रुपैया हात पार्नेछन् ।प्रतियोगिताको पहिलो, दोश्रो र पाँचौ संस्करणको उपाधि रुस्लान थ्री स्टार क्लबले उचालेको थियो । तेश्रो संस्करण अफ्रिकन युनाइटेड र चौथो संस्करण रूपन्देहीले जितेको थियो ।