एजेन्सी – सिजनको अन्त्यसँगै स्पेनिस लिगमा पनि खेलाडी किनबेच प्रक्रिया सुरु भएको छ । यसपटक रियल म्याड्रिडले खेलाडी अनुबन्धनमा कुनै ढिलाई नगरी ५ खेलाडी भित्र्याईसकेको छ ।

रियलले लगातार खेलाडी भित्र्याएसँगै क्लबबाट त्यसै अनुसार खेलाडी बाहिरिने क्रम पनि सुरु हुने अपेक्षा गरिएको छ । रियल मात्र नभएर अन्य ठूला क्लब एटलेटिको म्याड्रिड र बार्सिलोनाबाट पनि केहि ठूला खेलाडीले क्लब छाड्ने हल्ला चलेको छ । सामान्यतया ला लिगामा खेलाडीहरु त्यसै लिगको अर्को ठूलो क्लबमा बिरलै जाने गर्छन् । लिग उपाधिमा तीन टोलीको भिडन्त हुने भएकाले रियल, एटलेटिको र बार्सिलोनाले खेलाडीलाई अन्य लिगकै क्लबमा बेच्ने प्रयास गर्नेछन् ।

यस सिजन ला लिगा छाडेर अन्यत्र जाने ४ स्टार खेलाडी :

४. मार्सेलो (रियल म्याड्रिड)

सन् २००७ मा रियल म्याड्रिडबाट डेब्यु गरेका मार्सेलोले आफूलाई आधुनिक फुटबलका उत्कृष्ट मध्यम स्थापित गर्न सफल भए । पछिल्लो दशक रियलले हासिल गरेका हरेक सफलतामा उनको महत्त्वपूर्ण भूमिका रहँदै आएको छ । पोर्चुगिज प्रशिक्षक जोसे मोउरिन्हो छंदा केहि समय उनले पहिलो रोजाइमा पर्न प्रतिस्पर्धा गर्नुपर्यो । त्यसबाहेक उनी सधैं पहिलो रोजाइमा रहेका थिए ।

अघिल्लो सिजन मार्सेलोको लगातार गल्तीका कारण रियलले खराब नतिजा हासिल गर्यो । यससँगै उनले युवा खेलाडी सर्जियो रेगुलियनसँग आफ्नो स्थान गुमाए । यस सिजन फ्रान्सेली प्रशिक्षक जिनेदिन जिदानले लियोनबाट फर्लान्ड मेन्डीलाई अनुबन्ध गरिसकेका छन् । मार्सेलो आफैंले पनि गत सिजन नै रोनाल्डोसँगै युभेन्टस जाने चाहना व्यक्त गरेका थिए । उनले अब क्लब छाड्ने लगभग तय देखिन्छ ।

३. एन्टोइन ग्रिज्मन (एटलेटिको म्याड्रिड)

ग्रिज्मनले सिजनको अन्त्यमा एटलेटिको छाड्ने निर्णय गरेका थिए । उनले ५ सिजन क्लबमा बिताउँदै सफलता पनि हासिल गरे । अघिल्लो सिजन बार्सिलोनाले अनुबन्ध गर्ने प्रयास गर्दा उनले म्याड्रिडमै रहने बताएका थिए । यस सिजन उनले क्लब छाड्ने निर्णय लिएसँगै ग्रिज्मन बार्सिलोना जाने अनुमान गरिएको छ ।

यद्यपी बार्सिलोनाले यस पटक ग्रिज्मनको लागि औपचारिक प्रयास नगरेको खुलस्त पारेको छ । पीएसजी पुगेका नेयमारले बार्सिलोना फर्कने इच्छा व्यक्त गरेपछि क्लबको ध्यान अहिले ब्राजिलियन फरवार्डतर्फ मोडिएको छ । यद्यपी ग्रिज्मनलाई अनुबन्ध गर्न फ्रान्सेली क्लब पीएसजी र इंग्लिस क्लब म्यानचेस्टर युनाइटेड पनि तयार रहेको बुझिएको छ ।

२. फिलिपे कोउटिन्हो (बार्सिलोना)

जनवरी २०१८ मा बार्सिलोनाले क्लब कीर्तिमानी रकममा कोउटिन्होलै भित्र्याउँदा उनीबाट निकै अपेक्षा राखेको थियो । उनलाई क्लबले दिग्गज मिडफिल्डर आन्द्रेस इनीएस्टाको उत्तराधिकारीको रुपमा प्रस्तुत गरेको थियो । उनले सुरुवाती समयमा २२ खेल खेल्दै १० गोल र ५ असिस्टसहित सुखद सुरुवात पनि गरे । तर त्यसैअनुरुप पछिल्लो सिजन भने उनको लागि राम्रो रहन सकेन ।

कोउटिन्होले पछिल्लो सिजन ५३ खेल खेल्दै जम्मा ११ गोल मात्र गर्न सके । बार्सिलोना समर्थकले पनि उनको खराब प्रदर्शनका कारण उनीविरुद्ध खेलमा नाराबाजी नै गरे । यस व्यवहारबाट आजित भएका कोउटिन्होले क्लबबाट अन्यत्र जाने सोच बनाएका छन् । उनलाई अनुबन्ध गर्न उनकै पूर्वक्लब लिभरपुल पनि इच्छुक रहेको बुझिएको छ ।

१. ग्यारेथ बेल (रियल म्याड्रिड)

सन् २०१३ मा विश्व कीर्तिमानी रकम खर्चेर रियलले बेललाई क्लबमा भित्र्याएको थियो । त्यसयता क्लबका लागि १ सय २ गोल गर्दै बेलले क्लबलाई १३ उपाधि दिलाएका छन् । यसका बाबजुद रियलका समर्थक बेलको प्रदर्शनलाई लिएर खुसी छैनन् । चोटले संघर्ष गरेका बेलको भाषा समस्याले पनि उनले टोलीका सहकर्मी र समर्थकसँग राम्रो सम्बन्ध बनाउन सकेका छैनन् ।

अघिल्ला सिजनमा बेललाई रोनाल्डोको छायाँमा परेका कारण प्रदर्शन गर्न नसकेको बताइएको थियो । गत सिजन रोनाल्डोको अनुपस्थितिमा बेलले अपेक्षाकृत नतिजा दिलाउन नसकेपछि उनको आलोचना झनै बढेको थियो । उनले ४२ खेल खेल्दै १४ गोल मार गर्न सके । जिदानले २९ वर्षीय बेललाई आफ्नो योजनामा नरहेको प्रष्ट पारेका छन् । म्यान्चेस्टर युनाइटेड र इन्टर मिलानले बेलको अवस्थालाई नजिकबाट नियालिरहेको बुझिएको छ ।