एजेन्सी – कोपा अमेरिका २०१९ अन्तर्गत समूहको अन्तिम खेलमा अर्जेन्टिनाले कतारको सामना गर्दैछ । खेल नेपाली समयानुसार आइतबर मध्यरात १२:४५ बजे (सोमबार विहान) सुरु हुनेछ ।

प्रतियोगितामा खराब सुरुवात गरेको अर्जेन्टिनाको मिडफिल्डमा समस्या देखिएको छ । आक्रमणमा मेस्सीले राम्रो साथ पाएपनि मिडफिल्डका खेलाडी चलायमान नहुँदा डिफेन्सलाई केहि समस्या परेको छ । पछिल्लो खेलमा सुरुवाती रोजाइमा परेका लौटारो मार्टिनेजको स्थानमा सर्जियो अगुएरोले मेस्सीलाई आक्रमणमा सहयोग गर्नेछन् ।

कतारले पछिल्लो खेलमा कोलोम्बियासँग पराजय भोगेपनि आक्रमणमा केहि सम्भावना देखाएको थियो । केहि महिनाअघि मात्र एसियन कप जितेको कतारका अधिकांश खेलाडी एकै एकेडेमीबाट आएकाले राम्रो समन्वय बनेको छ । कतारले यस खेल जितेको खण्डमा क्वाटरफाइनलमा स्थान सुरक्षित गर्नेछ । त्यसैले पनि टोली हौसिएको प्रशिक्षक फेलिक्स स्यान्चेजले बताएका छन् ।

सम्भावित सुरुवाती ११ :

कतार : साद अल शीब, टारेक सलमान, बससम हिशाम, बौलेम खौखी, पेड्रो मिगुएल, अब्दुलकरिम हसन फद्लाला, अब्दुलअजिज हातेम, हसन अल हाइदोस, अली अफिफ, अस्सिम मादिबो, अल्मोएज अली

अर्जेन्टिना : फ्रान्को अर्मानी, निकोलस टाग्लियाफिको, जर्मन पेजेला, मिल्टन कासको, निकोलस ओटामेन्डी, लेआन्द्रो पारेदेस, रोबर्टो परेर, मार्को अकुना, जिओभानी लो सेल्सो, सर्जियो अगुएरो, लिओनेल मेस्सी

यसरी पुग्छ अर्जेन्टिना क्वाटरफाइनलमा :

पहिलो खेलमा अर्जेन्टिना कोलोम्बियासँग २-० ले पराजित भएको थियो । दोस्रो खेलमा पाराग्वेसँग १-१ को बराबरीमा रोकिँदा खेलको एकमात्र गोल लिओनेल मेस्सीले पेनाल्टीमार्फत गरेका थिए । दुवै खेलमा अर्जेन्टिनाले ओपन प्लेमा गोल गर्न सकेको छैन । प्रशिक्षक लिओनेल स्कालोनीले पनि टोलीको क्वाटरफाइनलमा पुग्ने सम्भावना जीवित रहनुलाई टोलीको भाग्य रहेको बताएका छन् ।

अर्जेन्टिनाले समूहको अन्तिम खेलमा आइतबार कतारसँग खेल्दैछ । समूह ‘बी’ बाट लगातार दुई जितसँगै कोलोम्बियाले क्वाटरफाइनलमा स्थान पक्का गरिसकेको छ । यस्तो अवस्थामा अर्जेन्टिनासँग समूह उपविजेता हुने सम्भावना पनि छ । पाराग्वेको २ खेलमा २ अंक छ भने कतार र अर्जेन्टिनाको १-१ अंक छ । गोलअन्तरमा कतारले अर्जेन्टिनालाई पछाडी पारेको छ ।

अर्जेन्टिनाको जित :

अर्जेन्टिनाले कतारलाई पराजित गरेको खण्डमा टोलीको क्वाटरफाइनलमा प्रवेश गर्नेछ । यद्यपी अर्जेन्टिनाले समूह उपविजेता नभएर उत्कृष्ट दुई तेस्रो स्थानका टोलीका रुपमा अर्को चरणमा स्थान बनाउने सम्भावना रहनेछ । तेस्रो स्थानमा रहेर क्वाटरफाइनलमा प्रवेश गरेमा अर्जेन्टिनाको भेट ब्राजिलसँग पर्ने सम्भावना बलियो छ । यसका लागि पराग्वेले कोलोम्बियालाई पराजित अथवा बराबरीमा रोक्नुपर्नेछ ।

अर्जेन्टिनाको बराबरी :

अर्जेन्टिना कतारसँग बराबरीमा रोकिएपनि अर्को चरणमा पुग्ने सम्भावना जीवित रहनेछ । यसका लागि पाराग्वेले कोलोम्बियासँग ३ गोल वा सोभन्दा बढीले पराजित हुनुपर्नेछ । यसका साथै समूह सी मा इक्वेडर र जापानको खेल पनि बराबरीमा सकिनुपर्नेछ । जापानले जित दर्ता गरे अथवा पराग्वेले अनुकुल नतिजा ननिकाले भने अर्जेन्टिना बाहिरिनेछ ।

अर्जेन्टिनाको हार :

कतारसँग पराजित भएको खण्डमा भने अर्जेन्टिना प्रतियोगिताबाट बाहिरिनेछ ।

‘कतार मेस्सीसँग सेल्फी खिच्न आएको होइन’ – प्रशिक्षक सान्चेज

पहिलो खेलमा पाराग्वेसँग २-२ को बराबरी खेलेको कतारले दोस्रो खेलमा कोलोम्बियासँग १-० को पराजय बेहोर्यो । २ खेलमा १ अंक जोडेको कतार समूह ‘बी’ को तेस्रो स्थानमा रहेको छ । कतारले समूह चरणको अन्तिम खेलमा अर्जेन्टिनाको सामना गर्दैछ । उक्त खेलमा जित दर्ता गरेमा कतारको क्वाटरफाइनलमा प्रवेश गर्ने प्रबल सम्भावना रहेको छ ।

खेलको पूर्वसन्ध्यामा बोल्दै कतारका प्रशिक्षक फेलिक्स सान्चेजले मेस्सी विश्वस्तरीय खेलाडी भएपनि कतार उनको सामना गर्न तयार रहेको बताए । ‘ हामी दक्षिण अमेरिकामा प्रख्यात टोली हैनौं । हामीसँग स्तरीय खेलाडी छन् र हामी प्रतिस्पर्धा गर्न आएका हौं, मेस्सीसँग सेल्फी खिच्न होइन,’ उनले थपे, ‘ अर्जेन्टिना बलियो टोली हो तर उपाधि दावेदार पनि । हामी विश्वको उत्कृष्ट खेलाडी भएको टोलीसँग कडा प्रतिस्पर्धा गर्नेछौं ।’

सान्चेजले कतारको पनि दोस्रो चरणमा पुग्ने सम्भावना रहेकोले खेलमा थप हौसला बढेको बताए । ‘हामीसँग पनि छनोट हुने बलियो सम्भावना छ । यसले टोलीलाई निकै हौसला दिएको छ । अझ हामीले अर्जेन्टिनाको यात्रा टुंग्याउने सम्भावना समेत छ,’ उनले भने ।