एजेन्सी – क्याटलान क्लब बार्सिलोनाले नयाँ सिजनको पहिलो अनुबन्धनको रुपमा ब्राजिलियन गोलरक्षक नेटोलाई भित्र्याएको छ ।
मंगलबार क्लबका दोस्रो रोजाईका गोलरक्षक जास्पर सिलेसनलाई भ्यालेन्सिया पठाएको बार्सिलोनाले बुधबार नै उनको स्थानमा ब्राजिलियन गोलरक्षकलाई अनुबन्धन गरेको हो । भ्यालेन्सियाका लागि पहिलो रोजाइमा खेलिरहेका नेटोले ४ वर्षको लागि सम्झौता गरेका छन् । क्लबले उनलाई भित्र्याउन भ्यालेन्सियालाई २६ मिलियन युरो तिरेको बुझिएको छ ।
२९ वर्षीय गोलरक्षकले गत सिजन भ्यालेन्सियाका लागि ४७ खेल खेल्दै १० क्लिन सीट राखेका थिए । उनकै उत्कृष्ट प्रदर्शनमा भ्यालेन्सिया च्याम्पियन्स लिगका लागि छनोट भएको थियो । बार्सिलोनाले उनको रिलिज क्लज २ सय मिलियन युरो तोकेको छ ।
नेटोले यसअघि युभेन्ट्समा २ सिजन बिताउँदै इटालियन लिग उपाधि पनि जितिसकेका छन् । गत सेप्टेम्बरमा संयुक्त राज्य अमेरिकाविरुद्ध खेलमा ब्राजिलका लागि खेलेका नेटो कोपा अमेरिकाको टोलीमा भने अटाएका छैनन् ।
