एजेन्सी – कोपा अमेरिका २०१९ अन्तर्गत बुधबार भएको सेमिफाइनलमा ब्राजिलले अर्जेन्टिनालाई हराउँदै उपाधि भिडन्तमा स्थान पक्का गर्यो ।

खेलको १९ औं मिनेटमा ग्याब्रीएल जेससको गोलमा अग्रता लिएको ब्राजिलले दोस्रो हाफमा उनकै पासमा अग्रता दोब्बर पार्यो । रोबर्टो फिर्मिनोले गोल गरेपछि ब्राजिल फाइनल पुग्ने पक्का भएको थियो । यसबीचमा अर्जेन्टिनाका कप्तान लिओनेल मेस्सी र सर्जियो अगुएरोको प्रहार पोस्टमा लागेर फर्किएको थियो । निकै प्रतिस्पर्धात्मक खेलमा ब्राजिलले अर्जेन्टिनालाई हराउनुको ३ कारण यसप्रकार छन् :

अर्जेन्टिनाको खराब पहिलो हाफ प्रदर्शन

पहिलो हाफमा अर्जेन्टिनाले खासै आक्रमण बुन्न सकेन । अधिकांश समय आफ्नै हाफमा बल खेलाएको अर्जेन्टिनाको मिडफिल्डले आक्रमणलाई बल पास दिन असमर्थ रहयो । दुई सेन्टर डिफेन्स पेजेला र ओटामेन्डी बल पास दिंदा हतारिएको देखिन्थे र केहि गल्ति पनि गरे ।

मिडफिल्डमा खेलेका पारेडेस र रोड्रीगोले आक्रमणमा बल दिन नसक्दा मेस्सी केहि तलसम्म झरेर खेल्नुपरेको थियो । ब्राजिलको पहिलो गोलमा पनि अर्जेन्टिनी डिफेन्डर उचित पोजिसनमा नहुँदा जेससले सहजै गोल गरेका थिए ।

जेससको आलोचकलाई जवाफ

कोपा अमेरिकामा गोल गर्न नसकेको भन्दै पछिल्ला केहि दिन ग्याब्रीएल जेससले निकै आलोचना खेपे । उनलाई सुरुवाती रोजाईमा खेलाउने वा नखेलाउने भन्ने विषयमा पनि सर्वत्र चर्चा भयो । तर प्रशिक्षक टिटेले उनीमाथि भरोसा गर्दै पहिलो रोजाईमा उतारे । जेससले प्रशिक्षकको अपेक्षालाई वास्तविकतामा बदल्दै ब्राजिललाई फाइनल पुर्याए ।

खेलमा एक गोल र एक असिस्ट गरेका जेससले अर्जेन्टिनाको डिफेन्सलाई लगातार समस्या दिइरहे । पहिलो गोलका लागि दुई डिफेन्डरको बिचमा रहेर सहजै गोल गर्ने अवस्थामा रहेका उनले दोस्रो गोलमा उत्कृष्ट मुभ देखाए । मिडफिल्डबाट बल अगाडी बढाएका उनले अर्जेन्टिनाका ३ डिफेन्डरलाई छक्याउँदै फिर्मिनोलाई सहज गोल गर्ने मौका सिर्जना गरे ।

टिटेको ब्राजिलियन रणनीति

ब्राजिलको राष्ट्रिय टोलीले टिटेलाई प्रशिक्षकमा नियुक्त गरेयता बिरलै खराब प्रदर्शन गरेको छ । फिफा विश्वकप २०१८ मा बेल्जियमसँग पराजित भएपनि प्रदर्शन खराब भने थिएन । टिटेले कोपा अमेरिका जित्न भनेर लामो समयदेखि टोली तयार पारेका थिए । अर्जेन्टिनाविरुद्ध प्रदर्शनले पनि त्यसलाई थप पुष्टि गरेको छ । उनले ब्राजिलको परम्परागत फुटबल भन्दापनि आधुनिक रणनीतिलाई खेलाडी अनुसार ढालेका छन् ।

ब्राजिलको आक्रमण क्षमता त बलियो छ नै पछिल्लो समय ब्राजिलको डिफेन्सले झनै राम्रो प्रभाव पारेको छ । गोलरक्षक एलिसन बेकरले जारि प्रतियोगितामा कुनै गोल खाएका छैनन् । उनले पाराग्वेविरुद्ध टाइब्रेकरमा मात्र नभएर खेलमा पनि थुप्रै प्रहार बचाएका छन् । थियागो सिल्भाको अनुभव र ड्यानी आल्भेसको कप्तानी मानसिकताले डिफेन्स झनै बलियो देखिएको छ ।