एजेन्सी – कोपा अमेरिका २०१९ को सेमिफाइनलमा घरेलु टोली ब्राजिलले अर्जेन्टिनालाई २-० ले पराजित गर्दै फाइनलमा स्थान सुरक्षित गर्यो । खेलपछि पत्रकारसँग बोल्दै अर्जेन्टिनाका कप्तान लिओनेल मेस्सीले रेफ्रीले ब्राजिलको पक्ष लिएको अभिव्यक्ति दिए । ब्राजिलका कप्तान ड्यानी आल्भेसले पनि मेस्सीको उक्त अभिव्यक्तिको समर्थन गरेका छन् ।

राष्ट्रिय टोलीबाट लगातार असफल रहँदै आएका मेस्सी यसपटक कोपा अमेरिका उपाधिबाट राष्ट्रिय टोलीसँग उपाधि खडेरी तोड्ने लक्ष्यमा थिए । तर ब्राजिलले दुवै हाफमा १-१ गोल गर्दै अर्जेन्टिनाको यात्रा सेमिफाइनलमा नै सिमित पारिदियो । ब्राजिलको जितमा प्रिमियर लिगका दुई स्टार रोबर्टो फिर्मिनो र ग्याब्रीएल जेससले समान १-१ गोल र एक अर्कालाई असिस्ट दिए ।

ब्राजिलविरुद्ध हारपछि आक्रोशित देखिएका मेस्सीले रेफ्रिका निर्णय ब्राजिलको पक्षमा रहेको आरोप लगाएका थिए । ‘ब्राजिल हामीभन्दा राम्रो खेलेको थिएन । उनीहरुले खेलको सुरुवातमै गोल गरे । तर दोस्रो गोल हुनुअघि हामीलाई पेनाल्टी दिनुपर्ने थियो जुन रेफ्रीहरुले ब्राजिलको पक्षमा निर्णय लिएका थिए,’ अगुएरोलाई पेनाल्टी क्षेत्रभित्र लडाएको घटना इंगित गर्दै मेस्सीले भने ।

‘ रेफ्रीले हामीलाई सामान्य फलमा पनि कार्ड देखाए । कतिपय अवस्थामा भिडियो असिस्टेन्ट रेफ्रीको प्रयोग पनि गरेनन् । खेल अवधिभर यस्तै भयो । रेफ्रीले अधिकांश निर्णय पहिलो नजरमै ब्राजिलको पक्षमा दिए । यसले गर्दा हामीले खेलमा लय समात्न सकेनौं,’ मेस्सीले थपे ।

मेस्सीले दक्षिण अमेरिकी फुटबलको सर्वोच्च संस्था कन्मेबलले यसबारे गहन अध्ययन गर्नुपर्ने बताए । ‘ हामीले हारबाट बच्ने बाटो खोजेका हैनौं, तर यो खेललाई अध्ययन गर्न जरुरि छ । आशा छ कन्मेबलले यसलाई गम्भीरतापूर्वक लिएर उचित कदम चाल्नेछ,’ पराजित टोलीका कप्तान मेस्सीले टुंग्याए ।

यता ब्राजिलका कप्तान आल्भेसले पनि रेफ्रीहरुले खेलमा उचित निर्णय लिन नसकेको बताएका छन् । ‘ रेफ्रीहरु हामी खेलाडी भन्दापनि नर्भस देखिन्थे । म मेस्सीको भावना बुझ्न सक्छु,’ उनले भने, ‘ अर्जेन्टिनामा निकै राम्रा खेलाडी छन् । हामीले आफ्नो पक्षमा नतिजा निकाल्न निकै मिहिनेत गर्नुपर्यो । रेफ्रीले केहि कठिन निर्णय लिएपनि हामीले आफ्नो प्रदर्शनको भरमा नै खेल जित्न सक्यौं ।’

ब्राजिलले आइतबार हुने फाइनलमा पेरुको सामना गर्नेछ । चिली र अर्जेन्टिनाले भने एक दिन अघि तेस्रो स्थानको खेलमा प्रतिस्पर्धा गर्नेछन् ।

यो पनि : ब्राजिलसँग अर्जेन्टिना हार्नुको ३ कारण