एजेन्सी – बार्सिलोनाका प्रशिक्षक इर्निस्टो भाल्र्भेडेले क्लबमा आबद्ध भएका दुई स्टारबाट क्लब र समर्थकले महत्वपूर्ण प्रदर्शनको अपेक्षा राखेको प्रष्ट पारेका छन् । हालै बार्सिलोनाले हालै एन्टोइन ग्रिजमन र फ्रेन्की डी जोङलाई भित्राएको थियो ।

डी जोङलाई टोलीका लागि भविष्यको भरपर्दो खेलाडीका रुपमा हेरिएको छ । अर्को तिर एट्लेटिको म्याड्रिडका पूर्व सुपर स्टार ग्रिजमनमाथि आफुलाई प्रमाणित गर्ने चुनौति रहेको छ । २२ वर्षे डि जोङ ६७ मिलियन पाउन्ड र ग्रिजमन १ सय ७ मिलियन पाउन्डमा यो समरमा बार्सिलोना पुगेका थिए ।

दुवैबाट उच्च प्रदर्शनको अपेक्षा गरिएको प्रशिक्षक भालभेर्डेले बताएका छन् । डि जोङका विषयमा चर्चा गर्दै उनले भने , ‘आयाक्सले जस्तै पछिल्लो सिजन उनले पनि उच्च प्रदर्शन गरे । उनले मिडफिल्डमा ताजगी दिनेछन् । उनी भविष्यका लागि हेरेर लिइएका खेलाडी हुन् । उनी त्यस्तो क्षमता भएका खेलाडी हुन् जसले आउने धेरै वर्ष उच्च प्रदर्शन गर्न सक्छन् ।’

भालभेर्डेले २८ वर्षे ग्रिजमनबाट ठूलो अपेक्षा गरेको बताएका छन् । ‘ला लिगाको उनीलाई अनुभव छ । डि जोङलाई भन्दा उनलाई यहाँको स्तर थाहा छ,’ उनले भने, ‘उनी तीब्र गतिका खेलाडी हुनुका साथै उत्कृष्ट फिनिसर पनि हुन् । हामीले उनीमाथि ठूलो भरोसा गरेका छौं । उनी जस्तो खेलाडी टोलीमा हुनुको महत्व हामीलाई राम्ररी थाहा छ । ‘

बार्सिलोनासँग सन् २०२४ को जुनसम्मका लागि सम्झौता गरेका ग्रिजमनले बार्षिक १५ मिलियनको आसपासमा कमाउने अपेक्षा गरिएको छ । जुन एट्लेटिकोमा भन्दा निकै बढी हो ।