काठमाडौं (हाम्रो खेलकुद) – चौथो संस्करणको ललित स्मृति यु–१८ फुटबल च्याम्पियनसिपको उपाधिका लागि आज साविकको विजेता ब्रिगेड ब्वाइज क्लब (बीबीसी) र विभागीय नेपाल पुलिस क्लबबीच प्रतिस्पर्धा हुदैछ ।

खेल दिउसो ३ बजेपछि सातदोबाटोस्थित एन्फा कम्प्लेक्सको एस्ट्रो ट्रफ मैदानमा हुदैछ । दुवै टोली उपाधि जित्ने लक्ष्यका साथ मैदान उत्रनेछ । बीबीसी उपाधि रक्षा अभियानमा रहँदा पुलिस पहिलोपटक च्याम्पियन बन्ने दाउमा हुनेछ ।

अघिल्लो वर्ष ‘ए’ डिभिजन लिग खेलेका ९ खेलाडीसहित एन्फा एकेडेमीका खेलाडीको बाहुल्यता रहेको बीबीसी अपराजित रहँदै च्याम्पियन बन्ने दाउमा हुनेछ । बीबीसीसँग ब्रिजेश चौधरी, शिशिर लेखी, रेजिन सुब्बा र रोशन रानामगर जस्ता नाम चलेका खेलाडीको साथ रहेको छ ।

समूह चरणको अन्तिम खेलमा पुलिसलाई ३–० ले पराजित गरेका कारण पनि बीबीसी उपाधि जित्नेमा ढुक्क छ । सेमिफाइनलमा मनाङमाथि ७–१ को फराकिलो जित हात पारेको कारण पनि बीबीसी पुलिसविरुद्ध उच्च मनोवलका साथ मैदान उत्रनेछ ।

यता, विभागीय नेपाल पुलिस क्लब साविकको विजेता बीबीसीलाई स्तब्ध पार्दै पहिलो पटक च्याम्पियन बन्ने दाउमा हुनेछ । पुलिसका लागि सन्जु सेन मुख्य हतियार हुनेछन् । उनी ७ गोलसहित सर्वाधिक गोलकर्ताको सुचीमा बीबीसीका ब्रिजेशसँगै रहेका छन् ।

पुलिसले सेमिफाइनलमा जावलाखेल युथ क्लबलाई ३–१ ले हराएर फाइनलमा बीबीसीसँगको भेट पक्का गरेको थियो । प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।
अखिल नेपाल फुटबल संघ (एन्फा) ले एन्फाका कार्यवहाक अध्यक्षको जिम्मेवारी सम्हालिसकेका पुर्व उपाध्यक्ष ललितकृष्ण श्रेष्ठको स्मृतिमा यो प्रतियोगिता गर्दै आएको छ । यसपटक लिग कम नकआउटका आधारमा २९ जेठबाट शुरु प्रतियोगितामा ‘ए’ डिभिजनका १४ टोलीका १८ वर्ष मुनिका टिमको सहभागिता रहेको छ ।

सुरुवाती दुई संस्करणमा विभागीय त्रिभुवन आर्मी क्लब च्याम्पियन बन्दा गतवर्ष बीबीसी च्याम्पियन बनेको थियो ।