एजेन्सी – इंग्लिस क्लब म्यानचेस्टर युनाइटेडले अर्जेन्टिनी स्ट्राइकर पाउलो डिबालालाई अनुबन्धन नगर्ने निर्णय गरेको छ ।

युभेन्टसका फरवार्ड डिबालाले सोचेभन्दा धेरै तलबको माग गरेपछि युनाइटेड पछाडि हटेको हो । युनाइटेड र युभेन्टसबीच डिबाला र रोमेलु लुकाकु साटासाट गर्ने प्रारम्भिक सम्झौता भएपछि दुवै क्लबले खेलाडीसँग छलफल सुरु गरेका थिए । युभेन्टस र लुकाकुको छलफल सकारात्मक भएपनि डिबाला र युनाइटेडको छलफलले टुंगो लिन सकेन । विगत केहि दिनयता छलफलमा रहेका दुवै पक्ष डिबालाको तलबमा भने अड्किए ।

डिबालाले युनाइटेड आउन नचाहेको भन्दै अत्यधिक तलबको माग गरेको युनाइटेड स्रोतले इंग्लिस संचारमध्यमलाई जनाएका छन् । युनाइटेडले क्लबसँग मौखिक सम्झौता गरेपनि खेलाडीसँग छलफल सफल नहुँदा प्रस्ताव स्वीकार गर्न नसकेको युभेन्टसलाई जानकारी दिएको छ । डिबालालाई क्रिस्टियानो रोनाल्डोले पनि म्यानचेस्टर युनाइटेड जाने सुझाव दिएका थिए ।

युनाइटेडले यसअघि लुकाकुका लागि जुलाईमा इन्टर मिलानले गरेको ६० मिलियन युरोको प्रस्ताव नकारेको थियो । युभेन्टससँग सम्झौता हुन नसकेपछि अब लुकाकुको भविष्यबारे भने प्रश्न उठेको छ । सन् २०१७ मा ७५ मिलियन पाउण्डमा युनाइटेड आएका उनले गत सिजन १२ लिग गोल गरेका थिए । यता इन्टरले भने लुकाकुलाई क्लबमा भित्र्याउने अन्तिम प्रस्तावको तयारी गरेको छ ।