एजेन्सी – च्याम्पियन्स लिग विजेता लिभरपुलले यस सिजनको युरोपेली सुपर कप जितेको छ । टाइब्रेकरमा युरोपा लिग च्याम्पियन चेल्सीलाई ५-४ ले पराजित गर्दै लिभरपुल च्याम्पियन बनेको हो । त्यसअघि अतिरिक्त समयसम्म लम्बिएको खेल २-२ मा सकिएको थियो ।

चेल्सीले पहिलो हाफको ३६ औं मिनेटमा अग्रता लिएको थियो । फ्रान्सेली फरवार्ड ओलिभिएर जिरुडले क्रिस्टियन पुलिसिकको पासमा उत्कृष्ट फिनिस गरेका थिए । तर दोस्रो हाफको सुरुवातमा नै साडियो मानेले खेल बराबरीमा ल्याए । निर्धारित ९० मिनेट १-१ को बराबरीमा सकिएपछि खेल ३० मिनेट समय थप गरिएको थियो ।

अतिरिक्त समयको ९५ औं मिनेटमा मानेले नै लिभरपुललाई अगाडी बढाए । रोबर्टो फिर्मिनोको असिस्टमा उनले गोल गरेका थिए । त्यसको ६ मिनेट नबित्दै चेल्सीले पेनाल्टीको मौका पायो । गोलरक्षक एड्रीएनले अब्राहमलाई लडाएपछि पाएको पेनाल्टीमा इटालियन मिडफिल्डर जोर्जिन्होले गोल गर्दै खेल बराबरीमा ल्याए ।

टाइब्रेकरमा लिभरपुलको सबै प्रहार सफल हुँदा चेल्सीका ट्यामी अब्राहम निर्णायक प्रहारमा चुके । लिभरपुलका गोलरक्षक एड्रीएनले उनको प्रहार बचाउँदै उपाधि दिलाए । यो लिभरपुलको चौथो सुपर कप उपाधि हो । बार्सिलोना र एसी मिलानले लिभरपुलभन्दा बढी ५-५ पटक यो उपाधि जितेका छन् । चेल्सी भने लगातार तेस्रो पटक सुपर कप खेलमा पराजित भएको छ ।