काठमाडौं (हाम्रो खेलकुद)– क्षेत्रिय स्तरको फुटबलमा नेपालका लागि भारतसँगको खेल सधै चुनौतिपूर्ण हुँदै आएको छ । दक्षिण एसियामा नेपालको सिनियर टोलीलाई भारत मुख्य चुनौति त हो नै, त्यसबाहेक अन्य टोली पनि निकै प्रतिस्पर्धात्मक रुपमा प्रस्तुत हुँदै आएका छन् ।

खास गरि महिला फुटबल र उमेर समूहको फुटबलमा हेर्ने हो भने नेपालका लागि भारत अधिकांश समय तगारो बन्दै आएको छ । महिला फुटबलको इतिहास हेर्ने हो भने नेपालले दक्षिण एसियाली खेलकुद (साग) मा तीन पटक र साफ च्याम्पियनसिपको फाइनलमा ४ गरि ७ पटक फाइनल उहि भारतसँगै हारेको छ ।

फुटबल इतिहासमा एक पटक मात्र महिला फुटबलमा नेपालले भारतलाई हराएको छ । गत वर्ष भारतमै आयोजना भएको हिरो गोल्ड कपमा नेपालले भारतमाथि जित हासिल गरेको थियो । त्यसअघि वा पछि नेपालले भारतलाई हराउन सकेको छैन ।

उमेर समूहमा भने नतिजा केहि फरक छ । नेपालले भारतलाई कडा चुनौति मात्र होइन उपाधि नै जित्न पराजित गरेको इतिहास पनि छ । ४ वर्षअघि पहिलो पटक आयोजना भएको साफ १९ च्याम्पियनसिपमा नेपाल च्याम्पियन भएको थियो । घरेलु मैदानमा आयोजना भएको उक्त च्याम्पियनसिपको फाइनलमा भारतलाई नै हराएको थियो ।

फेरि एकपटक नेपाल र भारत साफ यू १५ को उपाधिका लागि भिड्ने भएका छन् । भारतको कल्याणीमा आज यी दुई परम्परागत प्रतिद्वन्द्वि श्रेष्ठताका लागि भिड्नेछन् । प्रतियोगितामा यी दुई टोली सुरुवातबाट दाबेदार रहँदै आएका छन् ।

प्रतियोगिताको सुरुवात नेपालले हारबाट गरेको थियो । च्याम्पियनसिपमा नेपालको पहिलो प्रतिद्वन्द्विका रुपमा भारत रहेको थियो । जहाँ नेपाल भारतसँग ५–० को हार बेहोरेको थियो । निराशाजनक सुरुवातका वावजुद नेपाली टोली अर्को खेलमा सम्हालियो । श्रीलंकालाई २–० ले हराउँदै विजय लयमा फर्केको नेपालले त्यसपछि बंगलादेशलाई ४–१ र भुटानलाई ६–० ले हराउँदै अन्तिम दुईको यात्रा तय गर्यो ।

फाइनलमा नेपालले फेरि एक पटक भारतकै सामना गर्दैछ । यू १५ मा नेपाल अहिले सम्म च्याम्पियन हुन सकेको छैन । यसअघि सन् २०१३ र २०१७ मा फाइनल खेल्दा नेपाल पराजित भएको थियो । दुवै पटक नेपाल भारतसँग नै पराजित भएको थियो । जति बेला यो च्याम्प्यिनसिप यू१६ का नाममा हुने गरेको थियो ।

अहिले राष्ट्रिय टोलीका फरवार्ड रहेका विमल घर्तीमगर लगायतका टोली घरेलु मैदानमा ६ वर्षअघि भारतीय टोलीसँग नै पराजित भएको थियो । पछि विमल सम्मिलित टोलीले यू-१९ को फाइनलमा भारतलाई नै हराएको थियो । नेपालले फेरि एक पटक उमेर समूहमा भारतलाई हराउने मौका पाएको छ । नेपालले यो मौकाको कत्ति सदुपयोग गर्न सक्छ , त्यसका लागि केहि समय भने कुर्नुपर्ने हुन्छ ।

फाइनल खेलको प्रत्यक्ष प्रसारण दिउँसो ३:१५ बजे हाम्रो खेलकुद डट कममा हुनेछ ।